قالت مواطنة، تدعى سمر، اليوم الأحد، إنها ستقاطع الانتخابات البرلمانية، مضيفة: «أنا مقموصة وحزينة وحاسة إني اضحك عليّا، بس عشمي في ربنا يبقى كبير، وإن شاء الله لما عشمي في ربنا يتحقق هبقى انزل أشارك». وتابعت المواطنة، خلال مداخلة هاتفية للإعلامي عمرو أديب، ببرنامج «القاهرة اليوم»، عبر فضائية «اليوم»، «أنا محبطة، أنا انتخبت السيسي وأنا مبسوطة جدًا، لما نزلنا وكان عندنا طموح وأمل، لكن إحنا بنفهم برده مش أغبياء، حلمت بالمؤتمر الاقتصادي، ونجح، بس أخدت إيه منه؟ وكذلك قناة السويس الجديدة، أخدنا منها إيه؟». واستكملت: «هو إحنا بنضحك على نفسنا، مجلس النواب مش محتاجني، المجلس جاي يسن قوانين عشان يظبط الريس ويخليه بدّل ما هو فترة رئاسية واحدة يبقى فترتين، يشبع بها، بس هفكره بحسني مبارك والسادات قبله، وعايزة أقوله إنك كبستنا كلنا، وكلنا الحزن مالينا، موجوعين أوي، مكناش نتخيل منك كده، لأنك كنت الأمل اللي إحنا عايشين عليه، والأمل ده ضاع». واستطردت: «كنت الأمل يا ريس عشان نموت في البلد دي بكرامتنا، لكن أنا دلوقتي هموت بنقطتي، أنا مش فارق معايا حد، لا إخوان ولا نور، دول هُبل، دول مش فزاعة، إحنا نفخنا فيهم وطيرناهم في سنة، لكن الفزاعة الحقيقية هي الحزب الوطني اللي قعد على قلبنا 30 سنة، العيال اللي ماتت في الثورة كان ذنبهم إيه؟ وبقينا في الآخر عملاء وخونة».