لم أندهش عندما نشرت صوت الأمة في عددها السابق أن المجلس الموقر صرف 289 مليون جنيه في سنة واحدة، منها خمسون مليونا بدل انتقالات ومليونا ونص المليون مكالمات تليفونية فليس معقولا أن يخرج السادة الاعضاء عشان يتكلموا من عند البقال أو بتاع العصير اللي قدامهم، خاصة أنها مكالمات فيها حساسية شوية يعني مكالمة منهم كانت مع الحاج أوباما عشان كان زعلان شوية مع المدام. عندما أعلن السيد الرئيس حسني مبارك محاربة الفشخرة والمنظرة كان يقصد الحكومة طبعا لأن الشعب مش لاقي يطفح ولايتنيل علي عينه، ويعيش حتي زي الحمير عشان يتفشخر ويتهبب، بالإضافة إلي أنه مختوم علي قناة بختم النسر، يعني يحق لأي مخبر أن يسحبه كالبهيمة إلي القسم، حيث يتم وضع الاختام علي جثته كلها، ويطلع من عندهم جتته في ناحية.. وفشته ومصارينه في ناحية ده إذا كان مكتوب له عمر يعيش. لكن حكومة يامفشخرني وناسي هواك.. ريداك والنبي ريداك، أعلنت بالصوت الحياني، ولاصوت الوليه اللي طلقها جوزها، أن السيد الرئيس كان يقصد حكومة الصومال الشقيق، لأنه مش معقول إن شحط زي علي بابا أصبح بعد الضنا لابس حرير في حرير، والست مرجانة طول يومها نشوانة، وحكومتنا تلبس الطرحة والملاية اللف، وتركب الميكروباص بالنفر، أوكل تلاته ياخدوا توك توك ويقسموها علي بعض. لذلك. لم أندهش عندما نشرت صوت الأمة في عددها السابق، أن المجلس الموقر صرف 289 مليون جنيه في سنة واحدة، منها خمسين مليون بدل انتقالات ومليون ونص مكالمات تليفونية فليس معقولا أن يخرج السادة الاعضاء عشان يتكلموا من عند البقال أو بتاع العصير اللي قدامهم، خاصة أنها مكالمات فيها حساسية شوية يعني مكالمة منهم كانت مع الحاج أوباما عشان كان زعلان شوية مع المدام، والمجلس الموقر عاوز يهدي النفوس، ومكالمة مع الخواجة ساركوزي عشان يهمد شوية وبلاش حكاية الستات اللي فاضحنا بيها دي، يعني كلها مكالمات في الخير، وليس معقولا أن يركب المجلس الموقر قطر الحانوتية، اللي بيطلع من المحطة علي القرافة عدل، أو يتحنطر المجلس والناس تتفرج عليه. وطالما وزير الجباية عمال يلم فلوسنا بضرائبه العبقرية ويخرجها من جيبونا كما يخرج الحواة الثعابين فلماذا لاتتفشخر الحكومة، علي الاقل عشان ماحدش يتريق عليها، ويعيرونا بيها وحلوة يابلحة يامقمعة.. شرفتي أخواتك الاربعة. محمد الرفاعي
