كنت قاعد أنا وصديقي المسطول اللي فيه بعض الناس زعلانة إنه بأكتب عن واحد مسطول طيب عايز أقولكم حاجة مهمة جدا وليه نروح بعيد ليه همة الناس اللي عايشين دلوقتي وهمة أصلامش عايشين إنما تقدر تقول عايشين ميتين وفي غيبوبة زي ماقال الزعيم عادل إمام في مسرحيته (بودي جارد) (إحنا في غيبوبة لكن مش محسوبة ومصر بتتباع والمجرم شيك وأليط وبيكتب شيك). وبمناسبة الزعيم عادل إمام كنت قاعد أناوصديقي المسطول بنتفرج علي فيلم (إحنا بتوع الأوتوبيس) اللي عمله الزعيم عادل إمام من 30 سنة وسبحان الله كأن الفيلم يتحدث عن أحوالنا وحياتنا اللي عايشينها دلوقتي بالضبط.. نفس الظلم نفس السرقة. نفس القهر.. وسبحان الله برضه زي ما كان الإعلام عامل غسيل مخ للناس من 30 سنة إن الناس المعارضين والناس المظلومين المحبوسين والذين يقولون كلمة حق لوجه الله ولوجه الناس الغلابة كل دول خونة وضد مصلحة البلد والحقيقة المرة إن اللي ضد مصلحة البلد همه الناس اللي حاكمين البلد وبالصدفة لقيت دليل يؤكد أن البلد اتباعت وضاعت وسبحان الله هذا الدليل يعلمه ويعرفه الرئيس مبارك ولايطبقه!. الدليل هو القسم الجمهوري الذي يقسمه رئيس الجمهورية وبالصدفة وجدت هذا القسم الجمهوري قد قاله الرئيس العبقري الراحل أنور السادات سنة 1970 ويقول القسم( اقسم بالله العظيم أن أحافظ علي النظام الجمهوري وأن أحترم الدستور والقانون وأرعي مصالح الشعب رعاية كاملة وأن أحافظ علي استقلال الوطن وسلامة أراضيه). وعلي فكرة الرئيس مبارك برضه قال هذا القسم الجمهوري سنة 1981 ياتري عمل بيه ولا لأ؟ مش مهم المهم إن المسطول صديقي اللي الناس زعلانة إني بأكتب عنه قاللي رسالة مهمة وعاجلة وهو سؤال محير صديقي المسطول الذي اكتشف أن الرئيس مبارك عاش أكثر من ليلة القدر اللي ربنا أقسم بيها في القرآن لأن عدد سنين ليلة القدر 83 سنة وشهور والرئيس مبارك ماشاء الله قرب يوصل سنه الي 90سنة يعني كده ممكن الرئيس مبارك يعيش ليوم القيامة والله أعلم. نرجع تاني لفيلم الزعيم إحنا بتوع الاوتوبيس الذي يكتشف الناس في نهاية الفيلم بعد حدوث النكبة أو النكسة أن النظام الحاكم نظام ظالم فيثورون بعد اكتشافهم إن الاعلام الفاسد خدعهم والنظام الحاكم سرقهم وظلمهم ياتري حيجي اليوم اللي يثور فيه الناس الميتين دلوقتي ضد الظلم برضه الله وأعلم. ملحوظة هذه أخر مقالة أو رسالة أكتبها مع المسطول.