كان فيه زمان حي الزمالك شوارعه هادية طريقها سالك اطفاله هادية مؤدبة سكان لطيفة مأصله وكام جنينة و مكتبات ثقافة بتوسع مدارك ********************** كان فيها سكان أغنيا أو ناس عادية زينا الكل بيشوفهم يقول أما صحيح ولاد أصول صوتهم مايعلاش في المعارك ************************** سكانه عارفين بعضهم بينقل الناس عندهم إزاي يحبوا حيهم لو تطلب الخير منهم الكل يجري عشان يشارك ************************** في الشدة معدنهم يبان في الفوضى وقفوا ديدبان اتجمعوا كل الجيران زي الجنود وسط الميدان هم حماتنا من المهالك ********************** تشهد شوارعنا علينا لما في 30 يونيو جينا مسيرة عند فنون جميلة ومسيرة من نادي الجزيرة ستات كبار نزلت تشارك *************************** يمشي الأجانب آمنين والسفرا عايشين مبسوطين تلقى وشوشهم مألوفين عند الجميع و البياعين الكل صاحبك ولا جارك ********************** أشجار عتيقة معمرة ولسه عالية مثمرة قصور وفيلات عامرة فيها حدائق مزهرة النيل على حدودها يبارك ********************** دة حي فيه عبق الزمن اثار جديد مالهاش ثمن قصور تعيش رغم المحن جزيرة تزهو ع المدن الكل يتباهى بجمالك ********************** فجأة صحينا ع الخبر هجوم جحافل من البشر ماشية تقطع في الشجر وتبني اسوار من حجر وكأنهم داخلين معارك ********************* خلاص تأكد النبأ فيه ناس بتحفر النفق وكأنهم داخلين سبق وحينا منا اتسرق غريب بيتحكم في مالِك **************************** عرضنا مليون اقتراح وكل حل بديل متاح قالوا اعتراضكم مش مباح أرض الجزيرة تستباح من ناس ضميرها سواده حالك ******************* يا حكومة ارجوكي اسمعي شوفي المصيبة و امنعي خدي اراءنا و اجمعي يمكن في حكمك ترجعي لو مصلحتنا صحيح في بالك *************************** إحكوا لأحفادكوا الحكاية كان فيه جزيرة في البداية النيل بيحرسها بعناية حفروا النفق فيها نكاية ونهايته تدمير الزمالك