( إلى كل من يحاول سرقة الثورة الشريفة البيضاء ) صباح الخير يا وطن طلع النهار عايش أنا جِوَّاك محفور انت جوايا نقطة و دايرة وحوداية و أرق كلماية سهران أنا للصبح أتغزل فى عيونك الحلوين وانت يا ترى يا وطن بتغنى لمين ؟! أياك تكون بتغنى لسرَّاقين الثورة و إياك تكون ناوى توزع التورتة عليت الأنا يا وطن الكل عايز خرطة كسرنا الدايرة و دخلنا فى دايرة الفوضى قل لى يا وطن هى الحرية دى ورطة ؟!! و اتحل عقدك يا وطن حباته بقت فارطة بس انت ذكى يا وطن بتفرق ما بين الصفر والحق و الشرطة مسجون أنا فيك يا وطن و انت يا وطن مسجون فى مين ؟؟ مين رسم قضبان سودا على خدودك الحلوين ؟! ومين قيد الأقدام ؟ ومين سرق كحل العين ؟! ومين خلاك تطاطى ؟ و مين كسرلك عين ؟ ومين عقد اللسان ؟ ومين ربط الإيدين ؟ انطق .. انطق تاريخ الحق قول مين و فين ؟!! ان كنت ابكم يا وطن أنا أقولك مين قطع لسانك يا وطن فرعون واكل ناسو فاكرهم شوية نمل و ينداسوا النمل كبر وبقى خلية نحل شايل فاسو ومن وندوز صغير خطى برجله على الباب و ترباسو كسَّر الحيطان على فرعون و حراسو و فى شبر ميه وقعوا و غرقوا و احتاسوا و انكتب النعى ... بالخط الأحمر هَنَّا الوطن وناسو قلنا خلاص قلنا خلاص فاق الوطن واتراعى إحساسه وجيش عظيم شال الولاد حضن البلاد سجد العباد جوة الميدان دول هم حراسو قلنا خلاص قلنا خلاص فاق الوطن و اترفع راسه وفجأة و احنا بننتقل ! زادت أنا ... عليت أنا وظهروا فى مليون قَنا وطلعت ديدان الأرض تتسلق التورتة نهابين ... و مرتزقة الكل عاوز خارطة واختلط الحابل بالنابل واختلط الثائر بالفاجر والحق بينده فى مالطة واتحل عقدك يا وطن حباته بقت فارطة بس انت ذكى يا وطن بتفرَّق ما بين الصفر والحق والشَرطة داغير الديب يا وطن عامل حبيب ومستخبى ورا الجدار وبيسرَّب جواسيسه والخطة إيه ؟!! قال يقسموك شمال وجنوب هلال وصليب يشعل فتيل و تبقى نار أصله جبان يا وطن و أصله فار لأ ... و الأكادة جوة الهلال طلعت نجوم بيقسموه شفت اللى صار ؟! قال إيه كمان بيتسلقوا ويسرقوا التورتة كانوا فين زمان ؟ وكانوا فين وقت الميدان ؟! وكانوا فين لما انحنى و انجلد ظهرى جوة السجون ؟! قسوة وجنون ! كانوا فين لما مسحت الشوارع ؟ بكتب كرامة ... بكتب عدالة برسم النور على جبينك لجل ما تكون إوعاك تغنى يا وطن لسراقين الثورة بس انت ذكى يا وطن بتفرق ما بين الصفر والحق والشرطة