أنا اللى طول عمر عينى بتقدر تميز بين غنوة صبر معقوده تريد تنحل وطرف عدودة فى حنك الأرامل نفسها تدوب زغاريد بس النهارده.. مين اللى رايح للجنة.. ومين اللى نازل للبحر.. يا هلترى.. الدنيا هتعيش من بعدينا قد إيه..؟! الليل كان صعبان عليه يرحل والقمر مش مبطل عياط ولا نهنهة الضنا غالى والوطن بينا بيتعاجب بس الليل خاين والنهار شاهد عيان حتى الأرض بتطرح دود فوق التراب يلقى الدم والخلا خيمة وسكن اَه يا قلب العيال.. يا متحزم فى الميدان والليل بياكل فيك لو تزعق بالغضب.. يجرى الزمن قدامك زى الريح ما يهمكش صفير الحنش الباغى أبو الجلد خشن.. مدام بتعزم بالقسم.. !!!!!!! جالك كلامى يا وطن.. البحر النهارده غير كل يوم.. البحر أخطبوط والموج دراعاته عفية.. البحر.. جوفه غويط اللى ينزل جواه ما يطلع غير بشهقة مهمن غالب قوة الغرق مهمن عافر وسط العشمانين. ينشف حواليهم.. البحر شبرين يادوب بينى وبين جنة حلمك يا وطن مسكون بالغريب ولا تعرف الواجب ماشى على راسى وعنيا مرغرغة على خلق بتلف حوالين روحها والكعب داير.. تتعب وتشقى وبرضه ترجع من غير ما تتراضى أنا اللى بقول: الحزن له مطرح وناس تسكن جواه مهمن يجور عليها الزمن ويخطف فرحتهم عشان خاطرهم.. عنيا تبوس الشمس وصابحة بتغنى عشان خاطرهم وخاطر ربنا من غير ما تزعل منى.. الدنيا هتعيش من بعدينا قد إيه..؟! إنطق يا وطن.. الدنيا هتعيش.. قد إيه..؟! بعدينا!!
