بلغني أيها الملك السعيد ذو الرأي الرشيد أن عصابة علي بابا أحكمت قبضتها علي المشاهدين الغلابة , فما أن يأتي الفطار إلا والجميع علي نار والكل في انتظار من أول رامز وجتته مولعة بالنار وضيفه مرعوب وهوه واخدها هزار , وبرغم لهيب الجو والأسعار , إلا أن الجميع عنيه لازقه جوه الجهاز وكأنها حتة قزاز…تنهدت شهر فأصيب شهريار بالقهر ونادي وقال : يا مسرور الولية دي بتلف وتدور هات السيف , قفزت شهر زاد واعتدلت في جلستها وقالت فى دلال : إلا السيف هوه عندك كيف ؟ دإنت غلبت المسلسلات ..شوف يا شهر الحكاية أن النساء عندما ياتي المساء كلهن سواء فلا الباروكات تنفع , ولا الألوان تشفع من أول بديعة وتحية لحد نانسي وصفية , والراجل غلبان لا عارف أبيض ولا اسود ولا غامق ولا فاتح والراجل المظبوط بيعمل نفسه فاهم , كملي يا شهر في ليلتك السودا اللي مش طلع عليها نهار , أنا مليت منك بصراحة ومليت الانتظار…ردت شهر زاد لأ أصبر الأمر أصبح صعب , قال شهريار وقد قادت في جتته النار : باقولك إيه سيبك من شغل السبتيه والملاية اللف والحركات الحق عليه اللي عملتك ست م الستات ولبستك ودلعتك واديتك كل الحنان والآخر تقولي عليه بخيل زي مأمون الجعان , قالت شهر: شفت هوه ده الكلام زمان كنت باجمع العيلة أنا وآمال والمهندس وشويكار وكنا إذاعة الخيال شغال ' لكن النهارده يا خسارة الكل باصص لحاجة واحدة في كل ليلة واتفرقت كل العيلة احكي يا شهر زاد يا اللي اتأخرت ف المعاد وحاولي تفهميني حاجة صعبة في مسلسل الميزان : ليه جوز المحامية أخفي الدليل عشان الراجل يحكموا عليه بالإعدام والله من ساعتها ما عارف أنام والشعب مديون مش عارف بكام وليه يسرا الحلوة دي صابها الجنان ؟ حاجات ياشهر في المسلسلات شقلبت كياني , وبيجيني كوابيس في قلب المنام , معلهش فيه ممثل اسمه سيد رجب لا ليه شكل ولا لون وبييجي يمثل مع الحلوين ليه هوه ماسك عليهم ذلة وأنا اللي عيشتي معاكي حرام كل اللي شايفه منك كحل وفستان بكمام آه يا خيبتي منك لا منك بتكسبي من المسلسلات والأفلام ولا منك سيباني أقلب عيشي ع الأقل أنا برقبة سيد رجب وأحسن من عادل إمام..تنهدت شهرزاد وطلبت من رب العباد علي مرأي من الأشهاد وقالت تجيلك رزية يا عرة الملوك وكل أهلك سبوك ترازي فيه وأحكيلك حواديت وسبت كل اللي وراك تلعب شوية وتضحك شويه وكمان بتحب عليه وكل اللي شغلك كل ما تشوف واحدة حلوة تقول مين يا شهر ديه دانت غلبت التليفزيون جك طاعون وتحل عن سمايا واشوف لي مخرج يجعل لي منك مخرج
