إكتمل عقد العائلة المصونة { عائلة مبارك } لتدخل جميعها دائرة الشك والتحقيقات حول قضايا الفساد ؛؛ فبعد جمال وفساده السياسى وعلاء وفساده المالى ؛؛ تدخل والدتهم الدائرة بملف آخر للفساد ؛؛ وهو ملف حسابات تبرعات مكتبة الأسكندرية ؛؛ التى ذهبت معظمها فى حسابات خاصة لسيدة مصر الإولى ( ماما سوزان ) 0 وبذلك تكون العائلة الصغيرة جميعها قد إستغلت منصب الوالد لن أقول التربح من وراءه و لكنها سرقة أموال الشعب المصرى الذى كان يتصارع ويتقاتل فى بعض الأحيان من أجل الحصول على خمسة أرغفة بلدى مطعمين بالشوائب والأحجار الصغيرة والأخشاب من أمام الأفران فى المناطق الشعبية 0 هذا بالطبع خلاف العائلة الكبيرة ( أنُكل صفوت ) الذى مازال يدّبر ويخطط لإفشال الثورة والحد من نتائجها ؛؛ والبقاء على ماتبقى من حزبه المنهار ؛؛ ومصمم يدوّر على ( الهيكل ) زى إخوانا ( اللى مايتسموش ) ؛؛ أو ( أنُكل سرور ) اللى مازالنا بنسمع صوته فى كافة البرامج وهو يفخر بمجلسه المزوّر وبديمقراطية هذا المجلس العظيم وإنجازاته ؛؛ أو عمو ( العادلى ) اللى كان بيخطط بنفسه وعامل ( قاعدة ) لحسابه أهدافها ضرب الكنايس المصرية وشق صف الوحدة الوطنية ؛؛ أهو برضه عشان جهازه يشتغل بدل ما يقعد عاطل أما جدو ( عاطف عبيد ) ياسلام ؛؛ عمل مزاد على بيع مصر وبرخص التراب ؛؛ وماكنش فاضل غير إنه يبيع الإهرامات وأبو الهول وتمثال سعد زغلول ( بس يا خسارة مالحقش ) ؛؛ وجدو التانى يبقى ( يوسف والى ) الراجل اللى دّخل الزراعات المصرية عصر السرطنة من أوسع أبوابها ؛؛ وعمّر المستشفيات بالمرضى وبكدة يبقى إكتمل الإنجاز ( فقر ومرض وجهل ) ودول اللى بيخلوا الحاكم وحاشيته يقعدوا لأطول وقت ممكن فى الحكم 0 أما أخويا الكبير فى المقام والمال ؛؛ الصغير فى القامة وشبه العيال ( عز ) ؛؛ فبسم الله ماشاء الله ؛؛ مد أيده وغرف من الخير ؛؛ وودّا فلوسه على بنوك برة وجوة ؛؛ وكان عامل عنتر ومتغندر ؛؛ وأنا بقول بدال ماتسجنوه ؛؛ أدولوا جايزة الدولة التقديرية ؛؛ على إنه فوّق الشعب المصرى من سياسة الملوخية ؛؛ اللى كان هو وجمال بيطبخوهالنا ويأكلوهالنا كل يوم 0 أما زهير وجرانة وأباظة ؛؛ فدول قرايب من بعيد ؛؛ وحُط عليهم شوية وزرا كانوا متعينين ؛؛ كدبوا على ربنا وحلفوا اليمين ؛؛ وأما قعدوا على الكرسى طمعوا فى الملايين 0 ولسة العيلة مليانة ؛؛ وبكرة الكشوف تبان ؛؛ والعيلة تكبر وتكبر وتكبر ؛؛ وأهو بالمرة احنا من بعد عيلة ( محمد على باشا ) ماكنش عندنا عيلة ؛؛ أهو دلوقتى عندنا عيلة ( مبارك الكبيرة ) اللى نملى بيها كتب التاريخ ل 30 سنة أدُام ؛؛ ونحكى عنهم لأولادنا وبناتنا ومانبطلش عنهم كلام ؛؛ سلام 0