تروح تنتخب ؟1 أنتخب ليه... و أنتخب مين ... مانا كل ما انتخب... أقول اللى انتخبته دا هاينجح ... دا الدنيا كلها انتخبته ... ولكن طلعت غلطان عارفين ليه؟! أتارى فية واحدة اسمها الحاجة نزيهة بتيجى بعد الإنتخابات وتقول مين اللى ينجح ومين اللى ماينجحش !!!! وطلعت غلطان لأن أنا روحت وانتخبت ... بدل ماكنت انتخب واحد مش هاينجح .. كنت أشوف الأول الست نزيهة هاترشح مين علشان انتخبه . واللى يضحك بقى لما تروح تنتخب......! تلاقى الأستاذ فتحى بقى اسمه حمدى والأستاذ جابر ماينفعش ينتخب لأن مافيش نقطة تحت (الجيم )يبقى صابر . هو فعلا صابر بس على المر والإهمال اللى موجود . والحاجة زكيه بقت حمدية ، وفوزية بقت نبوية ، والناس كلها معمية واللى شايف بيقول ماحدش له دعوة بيا . تروح تسأل على إسمك تلاقى الكشوفات فيها أسماء ناس ماتت وشبعت موت ، والأحياء مالهومش صوت ، طيب شوفوا دى" طفل عنده 3 شهور جاتلو بطاقة انتخابية فوصلوها لأبوه ، فقالوله دى بطاقة الأستاذ محمد ابنك .. لو سمحت تندهلوا ، قالهم ( عيونى حاضر بس أشوفه كمل رضاعة ولا لسة). هانحكى ايه ولا ايه .. ولو حكينا هايتغير ايه ...! انا بس هاطلب من الست نزيهة تقولى انتخب مين من الأول علشان ارتاح .