ميدان حريه ميدان تحرير = هبَّ الشعب عمل تغيير حطم كل قيود الباطل = دمَّرعهد لظلم مرير كنا نشوف الكدب مجسم = صوره شخابيط زى الأساطير كان الحلم معانا متكتف = بجناح مكسور إزاى هيطير؟! مهما شكينا ومهما بكينا = حتى اللحمه جابوها حمير حتى القمح جابوه متسرطن = واللقمه نشاره ويقولوا فطير أسأل ليه الأسعار تغلى = يقولوا أعذار وليها تبرير نشوف ثروات بشكل مفاجئ = ما تعرف أبدا ً ليها تفسير ترفع صوتك وتقول آه = تلقى ألف وميت تقرير تطلب حقك تبقى عميل = ويقولوا مجرم أثره خطير كنت مجرد جثه بتمشى = ممنوع أرفع صوت فى مسير خير بلادى محروم منه = ويقولوا حاقد ع المشاهيير شايف كل الدنيا ضلام = وصوتى ماكنش ليه تأثير كنا بنضحك على بعضينا = ونخدع روحنا بوهم كبير كنا نسقف جبن وخوف = ماشيين نهتف كالطراطير ظلم حقيقى وليه أنياب = رشوه فساد ومعه تزويير كل كلامنا كان مرسوم = ويقولوا حريه فى التعبير ديابه شبعانه واحنا موتنا = نطلب قوتنا يقولوا تبذير عشنا فى عشه وجوا مقابر = عشره فى أوضه وتحت سرير وحيتان بتمص الدم بتاعنا = حتى كلابهم لابسه حرير هب الشعب ينادى ويصرخ = مش رايح أبقى عبد أسير مش رايح أعيش أبدا ً مذلول = ولا هقبل تانى ترقيع دساتير ولاهسمح حقى يضيع قدامى = ولا هكتم صوت جواى لضمير