سجل يا تاريخ أعظم ثورة = أجمل قصة لتانى عبور كان الشعب عايش متغرب = جوا بلاده كان مقهور طافح كاس الذل مرار = علشان لقمة يلف يدور عايز يخلى الصحرا خضار = يلقى جناينه صبحت بور ضايع حقه قدام عينه = رشوه فساد وبهتان زور يغزل توب الفرحه سراب = نص العمر قضاه فى طابور صوت الضحكة معاه متكتف = مركب أمله ما لاقى بحور مخنوق صوته بحبال خوفه = يصحى يلاقى الهم فطور كل الصورة كانت شخابيط = مقطوف حلمه ف عمر زهور كان بيشوف الكدب مجسم = قلم الصدق ملهش سطور كان عطشان والنيل وياه = ساكن عشه رصيف وقبور كان محروم من خير أوطانه = حاسس إنه يا دوب طرطور كان الحمل بيقسم ضهره = مهدود حيل بجناح مكسور كان عريان وغيره بيملك = فيلا شاليه ورصيد وقصور مهما يصرخ يشكى ويبكى = كانوا يقولوا دى أزهى عصور كان الظالم نافش ريشه = ماشى يتمخطر كان مغرور حتى القمح جابوه متسرطن = ديابه بتنهش قوت عصفور خلوا الشعب تايه متغمى = عصابه بتعزف لحن شرور هب الشعب المصرى المارد = دمه بيغلى وكان بيفور حطم كل قيود الباطل = كشف الطابق كان مستور خلا فنون التزييف بانت = خلا ليالى الضلمه بدور خلا شمس بلدنا تغنى = خلا عهد الظل يغور