بقلم الشاعر الكبير : أحمد فؤاد نجم هذه القصيدة أبدعها الشاعر الكبير أحمد فؤاد نجم العام الماضي في عيد ميلاد الرئيس السابق الثاني والثمانين وبالطبع لم تأخذ طريقها إلي النشر .. ونحن ننشرها في عيد ميلاده الثالث والثمانين. سيدي الرئيس في عيد ميلادك الكام وتمانين كل سنة وإنت طيب وإحنا مش طيبين كل سنة وإنت حاكم وإحنا محكومين وإحنا مظلومين وإحنا متهانين ويا تري يا حبيب الملايين فاكرنا ولا إحنا خلاص منسيين فاكر المعتقلين فاكر الجعانين فاكر المشردين فاكر إللي ماتوا محروقين فاكر الغرقانين الله يكون في عونك - ها تفتكر مين وللا مين وللا مين في عيد ميلادك الكام وتمانين بقول لك كلمتين الأوله شيلتنا طين وهل تعلم أن النيل بقي رشاح وقرب يروح مع الرياح والجو أصبح بيئة والعيشة ولعة والشرفا قلوبهم عالبلد والعة وإنت عاملهم مذبحة ولا بتاعة القلعة والاقتصاد سداح والسرقة بقت كفاح ومصر متاحة بس للسياح وعرض البلد بقي مستباح والتانية ورتنا الويل دا الخطوة في عهدك بقت ميل والضحك بقي نواح وعويل والكوسة عارف الكوسة ممكن أقول لك فيها مواويل والجامعة بقت يا إما كباريه أو دار مسنين والشباب معظمهم من غير خمرة سكرانين والعلم عز علي المتعلمين والأساتذة بقم دجالين والقادة بقم طبالين واديني في الهايف يا حبيب الملايين والتالتة عارف اليابانيين زمان في سنة اتنين وخمسين كان عندنا تروماي وكان عندنا علم ومتعلمين وثقافة ومثقفين وأدبا وعلما وفنانين وكانو اليابانيين بالنووي لسه مضروبين وللصدقة مستحقين دلوقتي إحنا فين وهما فين هما فوق وإحنا في أسفل سافلين والرابعة أمن بلدنا بقي تنين والمحاكم اتملت مظالم والعدالة بقت كمالة وكلمة الحق في الزبالة وأصحابها في الزنازين والخامسة القطاع العام .. عام والفساد .. ساد وفي جتة بلدنا بيرعي أفتكر لجنابك إيه وللا إيه وكل ذكري ليك بدمعة آآآآآآه آآآآه أنا كنت حالف ميت يمين أكملهم لك تلاتة وتمانين بس هاكفيهم ورق منين وكل سنة وإنت........ وإحنا طيبين؟