معظم المشاكل لها حلول.. نحن نفكر معًا لإيجادها.. ممكن نخطئ وممكن نصيب المهم أننا نحاول.. والأهم ألا نيأس مهما تكاثرت همومنا. ونذكر بعضنا البعض دومًا بالمثل الشعبى الجميل: تبات نار تصبح رماد الحقيقة المرة اتجوزت بعد قصة حب وعشق وغرام وخروج وهزار وحاجات حلوة كتير ، كنت فاكرة إن قبل الجواز وبعده إن مكنوش حاجة واحدة فإن بعد الجواز أحلى،، كنت كل ما أقول كده أدام حد يضحك ويقولى هتتفاجئى بعد الجواز بالحقيقة المرة وكنت بأقول فى نفسى ده أى كلام ودى ناس معقدة وعايزة تضايقنى.. للأسف كلامهم طلع صح ومن أول 3 شهور، أيوه أنا بقالى 3 شهور متجوزة عيطت فيها كتير أوى كمية عياط عمرى كله رغم إنى مش الناس اللى دمعتهم قريبة وبيقولوا عليا حساسة، لكن بعيط كتير أوى ومن أقل شىء. جوزى أصبح أكثر غضبًا وعصبية وعلطول زعيق ع أتفه الأسباب لدرجة إنى بقيت أتلكك أروح بيت أهلى عشان أبعد عنه - ده كله فى أول 3 شهور - واصلنى دلوقتى إحساس إنى مش مبسوطة وده مضايقنى أصلاً لأن توقعاتى اتهدت فى وقت قصير جدًا. ورغم أن نوعية المشاكل بيننا صغيرة بس دايما بيقلل منى ويعاملنى مش حلو ،، مش عارفة عياطى اللى بيعصبه ولا تصرفاتى وهل فى حل لموضوع عياطى المستمر ده لأنى زهقت أوى وخايفة من الزهق يقلب لشىء تانى.. أعمل إيه؟
الحل المقترح: ماتهربيش وواجهى زوجك تلات شهور؟ انتى ما لحقتيش يا بنتى.. مستنية إيه عشان تتكلمى معاه وتحطيله حدود؟ أول سنة عادة بيبقى فيها خلافات وصدامات كتير بس المفروض دا يكون بأدب! مش بزعيق وشخط ونطر وتخويف! لو ماعودتيهوش إزاى يحترمك من دلوقتى هتندمى بعد كده لأنه حيتعود وحيكمل على كده.. جوزك على ما تعوديه فعلاً.. أى علاقة فى الأول كل واحد بيجرب يشوف التانى آخره إيه وبيقبل إيه ومابيقبلش إيه. تمامًا زى الأطفال بيفضلوا يجربوا مع أهاليهم يشوفوهم حيسامحوهم فى إيه ويعاقبوهم أو يزعلوا منهم فى إيه.. عشان كده إنتى لازم تحطى بينك وبينه حدود فى التعامل وتجبريه إنه يحترمها.. كمان لازم تاخدى موقف وتتكلمى معاه وتفهميه إن سلوكه بيضايقك وتدافعى عن نفسك وماتقبليش تصرفاته دى نهائى.. والمهم إنك ما تعمليش دا بزعيق زى ما هو بيعمل، لا بالعكس تعملى دا بهدوء ولكن بصرامة فى نفس الوقت. يعنى أول ما يزعق أو يشخط أو أى انفعال تردى بالراحة لكن بحزم وتقولى له: «مش هقبل إنك تكلمنى كده تانى أو تعلى صوتك عليا.. أنا لى لسان وعندى صوت وزيى زيك أقدر أعمل إللى بتعمله وأكتر لكنى محترمة ومتربية ومش هقبل أتعامل بالطريقة دى». تانى حاجة بعد وضع الحدود: تأجلى الخلفة.. بلاش تجيبوا أطفال دلوقتى.. أولا فى الحمل حتلاقى هرموناتك مخلياكى أكثر عصبية وأكثر حساسية وحتعيطى بمناسبة وغير مناسبة.. دا معروف عند الحوامل. فبلاش دلوقتى لغاية ما تتعودوا على بعض وتستقر أمورك.. وسؤال معلش إنتى متأكدة إنك مش حامل و دى هرمونات؟ تالت حاجة ماتهربيش وتروحى عند بيت أهلك.. حيتعود شوية شوية على عدم وجودك وحيقول أريح بلا عياط بلا وجع دماغ إنتى إفضلى و فهميه الحاجات اللى بتضايقك حتى لو هى بالنسبة له مش منطقية وتفهميه إنه يحاول ياخد باله منها.. ساعات كتير لازم تقولى الحاجة بوضوح وبشكل مباشر. حاجة أخيرة.. إجمدى كدة واقوى وكله بيتصلح بالصبر.. حوشى العياط إنتى لسه فى حلاوة البدايات..كله حيبقى زى الفل. والقرار قرارك
