صوتي تعب م المناهدة وعينه شبعت مشاهدة وانتي الأميرة المجاهدة مسألتينيش أنت مين؟! ... أنا المغني اللي باقي وصوتي يسبق ندائي من كتر صدق اشتياقي بحلم بقالي سنين ... طول عمري بحلم بعزك وبقلب يعرف يعزك ويصون كرامة مُعزك يا رحيمة بالمفسدين ... أنا اللي صوتي كمنجة عنب بناتي ومنجة حتي حمارتي اللي عرجة وقعت في أول كمين غني الفؤاد للغلابة حبك لوطنك عباده وانتهاك السيادة بذمتك يرضي مين ... ماليش في شغل الشطارة وأنا اللي باني الحضارة تعبي وشقايا خسارة في الخاين ابن اللئيم ... أنا الحكيم المداوي منسي في جوف الحواري ومن قُعاد القهاوي قالوا علي: (يتيم) ... من صغر سني باهاتي وصوتي سابق سكاتي باسعي لرزقي يوماتي وأقبض يادوب ملاليم تشهد علي الأماكن اللي مليتها مساكن أبني وأعلي.. ولكن ما بخدش غير الرديم ... ولادي شبعوا بطالة لفوها شارع وحارة وركبوا مركب نشارة وغرقوا في البحر العظيم ... وأموت في كل المعارك وأعرق وأكافح وأشارك وقلبي محروق بناري وأنتي معايا معاندة سديت في سلمك وحربك ودقت بردك وحرك وسالت دمايا في حجرك وأنتي عشقي المهادنة ... صوتي وصوتك ونس وندهتين ع الحرس وفي الكنيسة جرس وأدان علي المادنة ... وأنا اللي باقي عليكي وقلبي أهو بين إيديكي يا ترجعيني إليكي يا أموت بفعل الحنين