من بدء الخلق ليوم الدين هيفضل فى ناس بتحب ومش عارفة توصل للانسان اللى بتحبه، اوقات بيمنعها الكسوف او فروق او ظروف او مبيمنعهاش حاجة ومش ناقصها غير بس خطوة المبادرة. فى ناس بتحب ومبتعرفش تبدأ ازاى قصة الحب او انها تقول للى بتحبه انا بحبك.
رغم ان الموضوع ده مطروح من زمان الا انه متجدد وفى ناس بتغرق فى شبر ماية وبتبقى محتاجة حد ينصحها ازاى توصل للانسان اللى بتتمناه، هنمسك النهارده ازاى الولد يتكلم مع حبيبته ويعبر عن مشاعره ويحافظ على الانسانة اللى بيحبها، فى 6 طرق فيها الشفاء. حنفى!!.. ترااااك مفيش حنفى! علشان تنول قلب البنت التى بتتمناها فى البداية لازم تلفت نظرها ليك قاعدة ثابتة خدها فى الاعتبار «لو خليتها تفكر فيك.. هتحبك»، لازم تخليها تخصك انت بالتفكير رغم الناس الكتير اللى بيطلبوا ودها ودا مش هايجى الا بمعاملتك المختلفة ليها عن باقى الناس اللى حوليها.
لو كانوا بيعملولها الف حساب.. تجاهلها ولو كانت فى غاية الرقة والنعومة.. خليك جاف معها لو كانت عصبية.. عاملها ببرود ولو كانت جميلة جدا عاملها كأنها هواء ميقدرش تحريك شعرة واحدة فيك.
معاملتك الغريبة ليها هتصدمها فى البداية وهتخليها تفكر فى نفسها الاول ولما تلاقى انها زى الفل وعال العال هتفكر فيك وفعمايلك الغريبة معاها. لو قدرت تكسر القاعدة اللى راسخة عندها، اى قاعدة، صدقنى هتكون رجلها المفضل واعرف كويس ان البنت بتكره الرجل الضعيف المستسلم ليها حتى لو كانت عايزة تبقى هى الكل فى الكل وانك تبقى طعها لو اتحققت رغبتها دى صدقنى هتكرهك فمشاعر البنت بترتاح للرجل اللى بيقدر يسيطر عليها.
بخخخخخخ.. أنا بحبك!
لو بتحب واحدة ومش حسة بيك ومش قادر تقولها انك بتحبها. علشان توصلها لازم تبعد عنها بس تطاردها فى كل مكان بشرط انك تكون مجهول بالنسبلها بمعنى، ابعتلها مثلا رسالة من غير توقيع بس يكون مضمونها قصير جدا كلمة او كلمتان او تلاتة بالكتير. ابعت لها هدية بسيطة فى المناسبات من غير ما تكشف عن شخصيتك. خليها تلاقى اثرك فى كل مكان. اعمل الحاجات دى فى شهرين مثلا فى الفترة دى البنت هتحس انها محتاجة تقابل الانسان اللى بيطاردها فى كل مكان بشكل لطيف وهتفكر فيك بعد الفترة دى روح عرفها بنفسك. وانت المسئول عن افعالك يا ابن الناس.
كده؟!!.. ماااااشى!
لو البنت التى تحبها منفضالك ديما وانت قاتل نفسك اهتمام بيها وهى مش بتديك اى اهتمام، ومش بتقدر حبك ده متعملش اى حاجة غير انك تتغير معها لو كنت بتقولها كلام حلو كتير لم بقك خالص اسكت انسى عيد ميلادها وعيد حبكم وعيد الحب العالمى والمصرى اتظاهر وانت معها بالشرود.. قلل من مقابلاتك واتصالاتك معاها خلى منهجك معها الصمت والشرود والنسيان.
عندها هتقلق جدا ومخها هيودى ويجيب: «دا بقى يكرهنى دا انشغل بغيرى انا السبب انا السبب، اهئ اهئ. وهتحاول انها تعمل المستحيل علشان ترجع معاها زى ما كنت. ارجعلها عادى بس متندلقش زى الاول.
يا سيدى حنّ عليها!
اهم حاجة لازم تتوفر فيك علشان تخلى البنت تحبك هو انك تكون حنين مش قصدى السهوكة على فكرة انت فاهم غلط، الحنان دا حاجة كده البنت بتحسها فى كلامك وتعاملك، فالقوة من غير حنان قطر من غير فرامل يفرم اللى يقف فى طريقه.
فالبنت مهما كانت قوية وقاسية وعنيدة وبتعتمد على نفسها فهى اضعف ما يكون قدام كلمة حنان ودفء واحدة الحنان بالنسبلها زى البطارية هى اللى بتساعدها على الحياة وبتديها القوة انها تعيش وتقاوم الحياة الصعبة.
خفّ تعوم
مش فاضل بقى غير انك تزوق افعالك وتصرفاتك معها بخفة الظل خليك فى حياتها البسمة حاول ترسمها على شفتيها ديما خليك ظريف ولطيف معاها بس مش معنى كده ان تقولها منولوجات ضاحكة وتبقى اسماعيل يس عصرك! بالعكس خليك منضبط معاها فى نسب مرحك واختر الاوقات المناسبة لده.
وأخيرا
خليك واثق من نفسك فى كل افعالك وقراراتك قدمها لأن ثقتك فى ذاتك هى رصيدك عندها.
