بصراحة الدمعة كانت هاتفر من عينى عندما قرأت كلام الملياردير الفلتة بيل ابن عم جيتس أغنى رجل فى العالم..! جيتس بيقول إن حكاية كونه أغنى رجل فى العالم مش ظريفة خالص، زى ما البعض بيتخيل.. وأن امتلاكه لثروة تزيد على 50 مليار دولار، يعنى حوالى 300 مليار جنيه مصرى بالتمام والكمال هى مسألة تغم النفس..! أهمية كلام أخويا بيل ابن عم جيتس أنه بيمس شغاف قلبى، لأننى حاسس زى ما هو حاسس بالضبط إن الفلوس بتروح وبتيجى، لكن المهم الرجالة.. وأن البنى آدم مش بثروته، لكنه برعايته لبيته وأسرته..! فالفلوس على قفا من يشيل وأكتر من الهم على القلب بس فين النِفس اللى تصرف..!! فأنا شخصياً ماأحبش أبداً أكون مليونير ولا ملياردير.. بل دايماً باحب أكون «مديونير»، وده مش قُصر ديل يا أزعر، زى مابيقولوا، لكنه أمر حقيقى.. يعنى لو بقيت مليونير هاأعمل إيه بالفلوس..؟! هاألبس بدلة كل خمس دقايق.. وللاهاأكل 10 طقات فى اليوم.. كل طقة فيها من خيرات ربنا.. كباب.. كفتة.. كافيار.. استاكوزا.. أحمدك يا رب..!! عموماً.. كان الله فى عون أخويا فى الإنسانية الملياردير بيل ابن عم جيتس.. وكان الله فى عون كل ملياردير بيعانى نفس معاناته.. وربنا يتولى برحمته كل «مديونير».. عايش تحت شعار: عيش كحيان.. تموت مستور..! اللهم أحينا كحيانين وأمتنا كحيانين واحشرنا فى زمرة الكحيانين.. اللهم آمين..!!