وجه الفنان تامر حسني رسالة إلى الفنان أحمد آدم، بعد اتهام رواد مواقع التواصل الاجتماعي للأخير بالسخرية من الأول سعيا وراء "الترند"، وذلك بعد عرض أحدث حلقات برنامج "آدم شو" على قناة الحياة. وكتب تامر حسني منشورًا على حسابه الشخصي عبر إنستجرام، قال فيه: أستاذ أحمد آدم فعلاً بيدي درس حقيقي بيشرح فيه سمات العصر الحالي اللي كلمة تريند فيه جننت عقول بعض الناس وخليتهم يبيعوا مبادئهم وصداقتهم وأمانتهم، لمجرد أن الناس تعرفهم أو تتكلم عليهم. وتابع: ونسيوا أنه لا يصح إلا الصحيح عشان ده عدل ربنا، وأي أفاقين مع الوقت هتلاقيهم بيختفوا والمحترم الحقيقي هو اللي بيستمر أصل لما نهتم ونرد على كل كداب أمال اللي بيحبونا نعمل معاهم إيه؟. واستكمل تامر حسني خلال منشوره: "الحقيقة أن فعلاً الكلام السلبي هو اللي انتشر شكرا أستاذ أحمد آدم لكلامك وإشادتك الحقيقية في حقي هي شهادة عظيمة من فنان محترم وكبير بفنه وأخلاقه." تداول رواد مواقع التواصل الاجتماعي مقطع مجتزأ من برنامج "آدم شو" الذي يقدمه الفنان أحمد آدم على قناة الحياة، ويظهر فيه منتقدا وساخرا من الفنان تامر حسني. جاءت الفقرة التي تحدث فيها آدم عن تامر في إطار فكرة "الترند"، والترويج ل الكلام السلبي أضعاف الإيجابي، وراهن الحضور على انتشار تعليقه المسيء على الفنان تامر حسني أكثر من مدحه، كمثال على فكرة السعي وراء الترند. وفي البداية قال أحمد آدم عن تامر حسني: "تامر حسني مش كفاية عليك كدا بقا ولا إيه.. طلع لنا شعر صدره وقعد يسبّل للبنات". وأضاف: "تامر بيقدم شوية أغاني تعبانة ويعني إيه أكتر حاجة بحبها فيكي.. طيبة قلبك.. إسفاف، وأفلامه وحشة جدا، وهو اللي بيألف وبيخرج وهو اللي بيعمل موسيقى تصويرية، وهو اللي بيقطع التذاكر بيعمل كل حاجة، أنت مغني ولا كوميديان ولا أنت إيه بالظبط؟ كفاية عليك كدا". الفقرة كاملة تضمنت أيضا رأيه الحقيقي في تامر، إذ تحدث عنه بكلام إيجابي، قائلا: "تامر حسني هو فيه زي تامر حسني.. لما طلع قولنا يومين وهيخلص، بس الحمد لله الراجل مكمل زي الفل وبيعمل عظمة". وتابع أحمد آدم: "لما بيكتب وبيخرج وبيمثل وبيلحن وبيخرج، بيفكرني بأنور وجدي، بل أحسن لأنه بيغني أغانيه مكسرة الدنيا، ولما بيعمل سينما أفلامه كريتيف وبيعرف يفكر ويطور من نفسه، وبيكتب سيناريو ويخرج ويمثل". وأضاف: "أنا بالفم المليان بقول إنه عدى خلاص أنور وجدي لأنه هو من الأساس مطرب ويعتبر أحسن مطرب في مصر بيقف قدام الكاميرا كممثل، وبيعرف يرمي إفيهات واحنا كل كام سنة هيجي واحد زي تامر حسني". يذكر أن بني آدم شو هو عودة للفنان أحمد آدم، على الشاشات المصرية والعربية، ويناقش آدم، في البرنامج، بعض الظواهر والسلوكيات الاجتماعية في إطار ساخر. كما يستضيف نجوم المحتوى الكوميدي على منصات التواصل الاجتماعي، ونماذج متنوعة من المجتمع.
