كانت الأيام التي سبقت انطلاق المدارس مربكة لكثير من الأسر، قوائم لا تنتهي من الطلبات، على رب الأسرة تجهيزها قبل اليوم الأول من المدارس، وحين ظن شعبان عوض أنه لن يقتطع من راتبه جنيها آخر لشراء مستلزمات دراسية، أخبره طفله في أول أيام الدراسة بطلبات جديدة، تنفيذا لرغبات المدرسين: «مش هنبطل شراء طول السنة». لدى شعبان طفلان في المرحلة الابتدائية، واشترى مستلزمات دراسية ب 1200 جنيه، كانت من نصيب الحقائب و"الزمزميات" و"اللانش بوكس" وكشاكيل وكراسات وأقلام، وأدوات أخرى أساسية، غير أن ابنيه عادت إليه أول يوم وطلبا نقودا لشراء مزيد من الأدوات: «فأنا كنت فاكر إني خلاص اشتريت كل حاجة، لكن لقيت مثلا طلبات زي إحنا محتاجين كشكول 80 ورقة مش 60 عشان المدرس قال كده» يحكي الرجل وعلى وجهه ابتسامة ساخرة، ولأنه لا يملك أمام طلب الصغيران سوى الموافقة، رافقهم إلى مكتبة تقع قرب منزله، واشترى لهما ما رغبا فيه: «صمغ ودبابيس مكتب وورق ملون وأنواع معينة من أقلام التلوين، ودفعتلي بتاع 170 جنيه في الحاجات دي للاتنين، مع إني شاري حاجات قبل كده، فالموضوع زي العلقة السخنة». في أول أيام الدراسة، عاد يوسف محمد، الذي يدرس بالصف الثاني الإعدادي إلى المنزل، وبيده ورقة بها أشياء دونها لهم عدد من الأساتذة داخل الفصل، قبل أن يعرض تلك الورقة إلى أبيه: «إحنا اشترينا حاجات كتير قبل المدارس، بس لما تبدأ بنكتشف بقى حاجات نسيناها، زي الجلاد والتيكت وكشاكيل اللغة الإنجليزية وكشاكيل الرياضة» يحكي الصغير وهو يقف أمام مكتبة رفقة طلاب آخرين قدموا لشراء ما ينقصهم، على أن ذلك لن يكون الشراء الأخير بحسب صاحب المكتبة: «عملية البيع بتبدأ أول أيام الدراسة لكنها مبتخلصش مع دخولها بتستمر فترة، يا إما مدرسين بيطلبوا حاجات بعينها، أو الطلبة بيكتشفوا إنهم نسيوا حاجة، أو حتى مشتروش قبل كده» قالها محمد سلامة الذي يعمل في مكتبة تملكها أسرته منذ سنوات طويلة: «المشكلة إن الأسر بتبقى حاطة مبلغ معين على جنب عشان دخلة المدرسة فبيشتري كميات كبيرة وبعد كده يكتشف إن في طلبات تانية». كانت بتول محمد رفقة أخيها، نسيت الصغيرة شراء مقلمة، فاشترتها في أول يوم، إضافة إلى عدد آخر من الكشاكيل، بتكلفة وصلت نحو 70 جنيها. بعض المدارس الخاصة وزعت على الطلاب قوائم بها مواد أساسية لشرائها، وانطلاق الدروس الخصوصية قبل الدراسة بفترة طويلة، دفع أولياء الأمور في المدارس الحكومية لشراء بعض المواد مقدما، غير أن بعض الأسر لم تشتر أدوات المدارس إلا مع انطلاقها: «أصل ممكن أجيب حاجات بزيادة فأغرم أكتر» قالتها هويدى مصطفى، ولية أمر طالب في المرحلة الإبتدائية، وقررت شراء حقيبة وبعض الأدوات الأساسية، لكنها لم تشتر كشكولا واحدا، ومع عودة ابنها أخبرها برغبات المدرسين: «ده بالنسبالي أحسن». يبيع عادل عشري الأدوات المكتبية منذ 10 سنوات، وبالنسبة له فإن الزحام أقل من ذي قبل: «عشان الدروس كترت وعشان المدارس بقت تجهز طلبات في ورق، لكن برضه بعد ما الدراسة بتبدأ بيبقى في زباين لسة هتشتري أو تجيب حاجات اكتشتف إنها ناقصاها، وربنا يكون في عون أولياء الأمور». يعتقد محمد حسن، وكيل شعبة الأدوات المكتبية بالغرفة التجارية، أن حركة البيع ستظل مستمرة حتى نهاية الأسبوع الأول من الدراسة، ثم ستقل عملية البيع تدريجيا: «المدارس الإنترناشونال دول مخلصين كل حاجة خلاص، لكن غير كده، بنلاقي لكل مدرس طلبات معينة، والناس مضطرة تشتري».
