تغطية كلمتنا لندوة التفكير الابداعي " ازاي نحلم بالعقل "

نظم نادي المشروعات التابع للمنتدى المصري لرائدي الأعمال ندوة بعنوان (التفكير الإبداعي) يوم 23 ديسمبر في مكتبة الأسكندرية.
حاضر بالندوة أ.د/ مصطفى المقدم – إستشاري و مؤسس شركةAssets للتدريب والاستشارات الفنية، وتحدث عن الطاقة الايجابية التي أوجدها ربنا سبحانه وتعالي داخلنا، واللي نقدر بيها نحقق كل طموحاتنا، ورسم لنا طريق أحلامنا من أول ولادة الفكرة، إلى مرحلة كتابتها على ورق حتى تصبح واقع أمام أعيننا.
من أهم الحاجات اللي قالها:
أصعب حاجة ممكن تعمل لها فكر هي نفسك، جوانا طاقة كبيرة وكافية بس لازم نكون مؤمنين بأفكارنا ومؤمنين بإننا هنقدر نحققها.
- مهم جدا إنك تقرا وتدورعلى كل المعلومات وتعمل (up date) لنفسك طول الوقت...التكنولوجيا تضاعفت 300 مرة في أخر 20 سنة...مش بطلب منك تعرفها كلها بس لازم تعرف إيه اللي يفيدك منها وتتعلمه.
- إكتب كل أفكارك وبعدين نام أو غيَّر مكانك ، المهم تصفي ذهنك وماتقلقش الفكرة هتشتغل في عقلك الباطن وهتكبر نفسها وتطلع لك في النهاية أجهزوأحسن.
- أنا دلوقتي بقول ياريتني بدأت بدري، بس الفرصة دي قدامكم ماتضيعوهاش.
- إعرف إنت عايز بعد فترة تكون فين؟ وماتستعجلش أحلامك...بس جاوب على سؤال: عايز أصحابك أهلك والدك ووالدتك أولادك في المستقبل يقولوا "بابا مين؟"
- لازم تعرف نقاط القوة فيك ونقاط الضعف، وتختار الفريق المناسب من الناس اللي بتكمل نقاط ضعفك، مش هيفيدك ناس عندهم نفس نقاط قوتك ونقاط ضعفك.
- طول ما إنت مشغول بحاجة بتحاول توصل لها هتكون سعيد في حياتك ، لكن الفراغ بيسبب الملل من الحياة.
- لازم تحط نقاط محددة –زي ما بيقولوا خارطة طريق- تعرف هتحقق إيه؟ وخطواتك إيه؟
ولازم كمان يكون فيه خطة زمنية لده ماتسيبهاش كده، تحديد الوقت بيسرع في خطواتك كتير.
- الفكرة رغم كل أهميتها الكبيرة بتمثل 1% من مشروعك، باقي ال 99% جهد وعرق.
- ولاد البلد دايماً على لسانهم كلمة: "إعمل اللي عليك وسيب الباقي على ربنا" وده حقيقي جداً، إحنا بنعمل كل الحاجات العملية اللي قولنا عليها، لكن قبل كل ده بنكون مؤمنين إن ربنا هيكافئنا على الجهد اللي عملنا بأكتر من اللي إحنا إتخيلناه كمان.
وإنتهت الندوة بعد ما زودت مدارك كل الشباب اللي كانوا حاضرين وفتحت آفاق تانية لتفكيرهم...وعرفنا إزاي نحلم"بعقل" ، ومحتاجين إيه علشان نحقق أحلامنا.