العمر عدى بسرعه واتفاجئت انى بقيت تقريبا 21 سنه... حسيت انى تايهه و مقدرتش اعرف ولا احدد مين انا... واحد و عشرين سنه بقابل ناس و ببعد عن ناس و بعيش مع ناس .. فضلت افتكر وارجع اللى فات..لقيت ناس كتير أوى ممكن اكتب عنهم روايات و حكايات.. منهم اللى سافر و اللى هاجر ومنهم اللى مات.. وفجأه استغربت...!! استغربت للناس اللى بتبيع اصحابها و اهلها ، استغربت للناس اللى مبتقدرش قيمه نفسها ، و استغربت أكتر للناس اللى بقى سهل أوى الجرح عندها استغربت لما لقيت الاخ بيظلم أخوه ، استغربت لما لقيت الابن بيهين أبوه ، استغربت من الحياه اللى بقت كلها سراب ، استغربت للحب اللى بقى بيتباع بأرخص من التراب.. راحت فين الرحمه راح فين الوفاء..راحت فين المبأدى و الأخلاق..!! حسيت ان نفسى أغمض عينى وأروح فى حته بعيده واحلم بحياه سعيده..وأصحى القينى بقيت فى دنيا جديده ونمت... و حلمت... حلمت بدنيا مليانه حب و رحمه و حنان.. لقيت الناس رجعت زى زمان ، زى ما سمعت من بابا و ماما و جدى و زى ما شفت فى الافلام بيوت أبوبها مفتوجه على بعضها .. الناس فيها مش خايفه على نفسها .. ديما بتفكر فى راحه أصحبها و أهلها ومحدش يعرف ينام و بيت من اللى حوليه فى حد تعبان.... لقيتنى عايشه فى دنيا جميله مفهاش ظلم و لا حرمان.. لقيتنى فى كل مكان حاسه فيه بآمان .. مش بس وسط عيله و أهل و جيران.. لقيت الضحكه الصافيه جوه عيون كل انسان. كلنا بنراعى ربنا قبل ما نعمل أى حاجه تزعلوا مننا.. قبل ما نخون و قبل ما نقسى وقبل ما نظلم وقبل ما نجرح قلوبنا و قلوب بعضنا كلنا بنحاسب نفسنا ..قبل ما يجى اليوم اللى حنتحاسب فيه كلنا وفجأه صحيت صحيت لقيتنى فى دنيا عجيبه .. وسط ناس كل تصرفتها غريبه..
