مش عارفة إيه الحكمة في تقديم الساعة وتأخيرها كل رمضان.!!! هل للمساهمة في الإقلال من شعور الصائم بالصيام لمجرد معرفته أنه سيأكل مبكرا ساعة...!! المهم اللي هاحكيه ده حصل وطبق الأصل يعني من غير أي مبالغة مني... المهم قلت أعزم العيلة أول يوم وأخلص.. بصراحة العزايم بقت هم ما يتلم ما بين تكاليف ومابين صحة.. وحضرت كل اللي هايتقدم من اليوم اللي قبله.. بصراحة هو مش يوم هو ثلاثة أربعة أيام لدرجة أني كنت كل يوم أشم الحاجة لحسن تبوظ من الحر اللي إحنا فيه والولاد كل شوية يفتحوا التلاجة ويقفلوها..! وأعلنوا التغيير الساعة 12 وطبعا الوقت ده بيكون أحلي وقت لأكل الأرز باللبن مع الملائكة أصحابي، وقمت الصبح وطبعا أول حاجة عملتها إني غيرت ساعات البيت كله بطريقة أتوماتيكية... ودخلت المطبخ أشوف ورايا إيه، وابتدا الأولاد يصحوا واحد ورا التاني ومفيش ساعة ولقيت البيت فضي علي ولا حد بيساعد ولا حتي يناول وعرفت ليه بيقولوا خلفة البنات بتنفع .. رغم أن أختي عندها بنتين إيدك منهم والأرض، المهم جوزي رجع من شغله وعلامات غضب الله عليه طبعا قلة سجاير والشاي والقهوة وزاد وغطي علينا الحر والتكييفات اللي مش عاملة حاجة، ودخل علي الأوضة وأنا طلعان روحي في المطبخ وسمعت صوته من بعيد ومبقتش فاهمة ولا كلمة منه لكن قلت من باب الاحتياط أريح نفسي وأقول لا! أصل كلمة آه هاتفتح كلام مالوش معني .. وأنا لا فايقة أرد ولا أعرف بيقول إيه! وخلصت كل اللي ورايا ولقيت الساعة 3 واستغربت أوي من بركة رمضان حتي في الوقت وقلت طالما خلصت أخش أفرد طولي وأستريح قبل ما الناس تيجي وظبطت المنبه علي الساعة5 وقلت أنام في أوضة الولاد أصل تكييفها أعلي وأهو فرصة كمان أرتبها وهم في النادي ويا دوبك بفرد طولي .. إلا وأسمع صوت جوزي: منكم لله منكم لله هو أنا هاينفع لي صيام.. بصراحة متحركتش وقلت في نفسي أنا جاي لي ناس كتيرة ومش ناقصة مناقشة ووجع قلب وأكيد شوية وهايسكت.. وفجأة ..!! لقيت صوته اتغير وبقي لطيف وأهلا يا حماتي وإزيك ياعمي وشوية ولقيت أصوات عارفاها، الله إيه اللي جاب الناس بدري، دي الساعة لسة ماجتش 5 وطلعت أشوف إيه اللي بيحصل ولقيت ماما بتقولي هو انتي طالبة الأكل من بره السفرة ما عليهاش حاجة ..!!! السفرة ..!!! سفرة إيه ؟؟؟ إحنا فين والفطار فين؟! لقيت ماما بتقولي الفطار في بيتكم وبعد10 دقايق صح النوم !! وعرفت إن الساعات متأخرة ساعتين عن المفروض لأنني أخرت الساعة مرة بعد ولادي ما ظبطوها!!! وأن وفيق جوزي لما كان بيسأل كان بيسألني عن تغيير ساعتي !! وتبرع مشكورا بتغييرها..!!! ومن ساعتها حلفت إن لو مستر بج بن بنفسه غير التوقيت أنا هافضل زي ما أنا، علي فكرة الحكاية دي اتكررت معايا 3 سنين ورا بعض والحقيقة مش عارفة العيب مني ولا من التوقيت؟!