لما يقول لك: المعارضة الخائنة الفاجرة الفاسدة الداعرة العلمانية التى تكره الإسلام هى التى أوصلت مصر لما نحن فيه من أوضاع سيئة. قل له: ولمّا هى خاينة ما اتقبضش عليهم ليه، ولما هى فاجرة ما نفعتش نفسها ليه وتولت الحكم، ولما هى فاسدة ليه ناس كتيرة مصدقاها، ولما هى داعرة سعادتك يتقال عليك إيه وانت بتتفرج عليها، ولما هى علمانية وبتكره الإسلام كانوا عملوا إيه اللى بيحبوه غير أن أساؤوا له. لما يقول لك ميليشيات البرادعى وحمدين صباحى هم الذين اعتدوا على الإخوان وقتلوهم. قل له: ومن إمتى كانت لهم ميليشيات؟؟.. ولما البرادعى إرهابى كنتوا معاه ليه أول ما رجع مصر تدعموه وتؤيدوه، ولو حمدين صباحى له ميليشيات لماذا لم تقبضوا عليها وعليه، ولماذا لم تنزل لتخرب مصر بعد سقوطه فى الانتخابات؟؟ لو أنهم كذلك أليس استمرارهم دليلاً على كونكم فاشلين؟!! لما يقول لك: مقراتنا اتحرقت وما اتكلمتوش. قل له: نددنا بحرقها ودعونا الشرطة للقبض على من حرقها، وأنتم أنفسكم قدمتم بلاغات ضد معارضيكم بتهمة حرقها فلماذا لم تنتظروا نتائج التحقيقات لا سيما أن النائب العام الآن (بتاعكم)، ولماذا تنصبون أنفسكم خصماً وحكماً وجلاداً، وتعيشون دور الضحية وأنتم تضربون المعتصمين السلميين، وتضربون النساء ثم تدخلون لصلاة المغرب؟؟ لما يقول لك: المعارضة حطت إيدها ف إيد الفلول من أجل إسقاط رئيس منتخب، قل له: وانتو حطيتو إيدكم ف إيد مين ومين ومين.. تحب أفكّرك؟؟.. ، وبعدين مين اللى وحّد المعارضة والفلول.. مش قرارات رئيسك وعدم استماعه سوى للمرشد وخيرته وعريانه وبلتاجه وغزلانه وأمثالهم بدلاً من أن يسمع للجميع. لما يقول لك: كان فيه مخطط لاقتحام الاتحادية واحنا اللى أفسدناه.. قل له: يااا رااااجل.. ، وانت مخابرات والا حرس جمهورى والا جيش؟؟.. والا انت لبستهم طرح وقعدتهم ف بيوتهم عشان انت الواد المخلص اللى حتنهى الموضوع؟؟ لما يقول لك: نزلنا ندعم الشرعية.. قل له: وهى الشرعية دى تبقى أمك؟؟ أيوه أمك انت.. ألم تضعوا إعلاناً دستورياً ديكتاتورياً يحصن لكم شرعيتكم؟ فلماذا تنزلون للدفاع عنها.. أليس فى مصر سوى الإخوان المسلمين ليحافظوا على الشرعية؟؟ لما يقول لك: الدستور كان لازم يخلص فى ليلة عشان القانون بيقول كده. قل له: يا رااااجل.. ألم يكن الغريانى سيؤجل التصويت 48 ساعة لأن بعضكم اعترض على إحدى المواد؟؟.. اللى يؤجل 48 ساعة ما يؤجل شهرين حقناً للدماء، والا الأوامر كانت طلعت. لما يقول لك: الرئيس تدور حوله مؤامرات لا تدركها.. قل له: طب ما يقول لنا واحنا كلنا نقف جنبه.. يفضح المتآمرين وينزّل تسجيلات المخابرات والأمن الوطنى ع اليوتيوب عشان يفضحهم بدل ما هو فضحنا كلنا، ولتقرأوا الصحف العالمية لتدركوا فضيحتنا. لما يقول لك اللى اتقتلوا مننا احنا.. قل له: ومن تسبب فى موتهم وقتلهم؟؟.. ، ومن قال لك إننا لن نبكيهم؟؟ وماذا عمن قتل من الجانب الآخر ومنهم مسيحى (يمكن إخوان وما نعرفش) ومنهم صحفى فى الفجر (عادل حمودة بيشغل إخوان معاه دلوقت؟.. يمكن!).. ، ثم يا أخى من أصلاً أعاد تقسيمنا إلى جانبين بعد أن أعطاه كثيرون أصواتهم ثقة فى وعوده التى اتضح أنها كاذبة؟؟ لما يقول لك: ده بيحصل عشان الاستفتاء يتأجل وعمرنا ما هنأجله.. قل له: عار على من يبتغى الكرسى والتمكين أن يتسبب فى إراقة دماء من أجل غايته القذرة، وأن يبرر القتل والاعتداء لهذا الهدف؟. لما يقول لك: هنعمل الاستفتاء فى موعده والناس هتصوت بنعم غصب عنكم. قل له: انتخابات مجلس الشعب تمت على جثث شهداء محمد محمود، ذهب مجلس الشعب وتم حله، وبقى الشهداء وفضيحتكم، والاستفتاء كذلك سيذهب إن آجلاً أو عاجلاً، وسيعدل الدستور المصرى إن آجلاً أو عاجلاً، وستبقى مصر للمصريين وليس لجماعة أو لحزب أو حتى معارضة.. مصر أكبر منا جميعاً، لكنكم لا تدركون.