استنكر الإعلامي عمرو أديب، حادث قطار أسيوط، وحمّل الشعب المصري كله دون استثناء المسؤولية واصفاً إياه بالفاشل، وقال "نحن أسوأ شعوب الأرض احنا مانساويش حاجة، اللي حصل النهاردة قصة فشل كاملة لا استثنى أحدا، الرجل المسؤول عن المزلقان حاطط الشيشة والتلفزيون ونايم.. مقفلوش". وواصل هجومه ببرنامجه "القاهرة اليوم" على فضائية "أوربت"، قائلاً: "انتوا شعب فاشل، احنا مانساويش حاجة ولا تقولى قنديل ولا مرسي كلنا فشلة، والناس عندنا بتموت، وعندنا أسوأ تعليم احنا فشلة واجهوا نفسكوا". وتابع أديب، موجها حديثه إلى الرئيس المصري ورئيس الوزراء، "البلد كبيرة عليكوا سيبوها وامشوا انتوا مش قد مصر.. مصر كبيرة أوي عليك ياسيادة الرئيس"، وتابع "عمال تقول النظام السابق طب هو عمل مصايب أنت بتعمل أيه". ولم يتوقف عند هذا الحد، بل شن هجوما كبيرا على وزير الإعلام، الذي لم يبد رأيه في الحادث إلا بعد 7 ساعات، وقال أديب: "أنت زي أنس الفقي، وابقى اقفلها زي دريم، النظام السابق كان بيطنش وانتوا كمان بتطنشوا". وتابع أديب، "ريّحوا ضميركم وافرحوا وقولوا الأهلي كسب، احنا فشلة رئيس الوزراء فاشل، ورئيس الجمهورية فاشل، وزير التعليم فاشل ورجل المزلقان فاشل، وعمر البلد ماهتتصلح ريح ضميرك واكتبلك تويتة". كما استنكر التعويض الذي أعلنوا عنه لأهالي الضحايا، والذي بلغ 5000 جنيه، فقال: "الطفل عندك ثمنه أرخص من موبايل يا كافر "أنت المفروض تتكسف من نفسك" بدلا من أن تقول وا مرساه أنا أقول "وامصيبتاه".. أنت فاشل كلنا فشلة بلد كلها مافيهاش حاجة صح". وبالحديث عن النظام السابق تساءل أديب، "هو النظام السابق هو اللي قفل دريم؟ أومال النظام الحالي بيعمل أيه؟ ثم عاد ليشن هجومه على رئيس الوزراء الذي اعتبر وجوده أصغر بكثير من البلد، متساءلاً "إيه الفشل اللي انتوا فيه ده، الوزراة ضعيفة جداً"، وأضاف منفعلاً عندما حدث ذلك في وقت مبارك كان اغتيال أما عندنا أصبح قضاء وقدر". واستكمل أديب، "امشى وجيب حد من الإخوان لو مش قادر تكمل، ماتجتمعوا وتجيبوا رئيس تاني أنا مش خايف اقفلوها ولّا تطربقوها يا أخى حرام عليك لا عندك شاش ولا بيكربونات ولا صوديوم الراجل بيلم القرش عشان يعالج ابنه، قنديل لازم يمشي ياسيادة الرئيس ده أنت مشيت المشير".