حكى السيناريست عمرو سمير عاطف، مؤلف مسلسل الرسوم المتحركة "بكار"، من أين جاءت فكرة مسلسل الأطفال الشهير، قائلًا إنه "سنة 1997 الدكتورة منى أبوالنصر -الله يرحمها- قالتلي إن سهير الأتربي -الله يرحمها رئيسة التليفزيون في الوقت ده عايزه تنتج فيلم رسوم متحركة مدته خمس دقايق عن طفل من الجنوب، نظرًا لأن عام 1997 سمي عام طفل الجنوب وكان فيه اتجاه من الدولة للاهتمام بجنوب مصر بشكل عام وبالأطفال بشكل خاص". وأضاف عاطف، في تدوينه له عبر موقع التواصل الاجتماعي "فيس بوك"، أن أبوالنصر "قالتلى عايزين نعمل فيلم نوري فيه المعابد والآثار ويبقى فيه طفل صغير ومدته ما تزيدش عن خمس دقايق، روحت البيت وكتبت بكار اسم كان معلق في دماغي بعد ما قابلت راجل من النوبة اسمه بكار كان بيشتغل في مكان أنا كنت باشتغل فيه". وتابع السيناريست، قائلًا: "بما إني كنت أحيانًا باخد أخويا وأركب مركب أعدي بيها النيل خليت بكار يروح المدرسة بمركب، وبما أننا كنا داخلين بالفيلم ده مسابقة خليت أحداث الفيلم عن مسابقة، وبما أن اللي ها ينفذ الفيلم رسامين خليت بكار بيرسم، اترسمت الشخصيات رسمتها نيفين الجبلاوي وكانت عامله بكار بعمه زي السودانيين فقلتلها تغيرها وعملت ستوري بورد رائع". وأردف السيناريست، قائلًا: "كلمتني الدكتورة منى وقالتلي تعال اسمع أغنية بكار.. أنا قلت لمنير يغنيها كانت تحفة وعجبتني جدًا، واتعمل الفيلم وعمري ما كنت اتخيل ولو لثانية أن العمل ده ها ينجح للدرجة دي، والفيلم اللي كان المفروض تبقى مدته 5 دقايق بقى تلت ساعة والتلت ساعة بقوا 252 حلقة على مدار تسع سنين كبرنا وبكار لسه صغير وعمره ما ها يكبر".