قد يصدمك العنوان، ولكن قد تصدم أو لا إذا وجدت نفس الألفاظ والمشاهد التي يروجها السبكي في أفلامه مقتبسة من واقع تعيشه أنت يوميًا في المواصلات، والشارع، ووسائل التواصل الاجتماعي التي ربما أقف عندها كثيرًا؛ لأنها أسهل وأرخص وسيلة ترويج لأي سلعة رخيصة ووسيلة تشهير أيضًا، إن لم تكن توازي نفس أخطار أفلام السبكي. السبكي شخص بيصدر الواقع اللي احنا عايشينه ببذاءته بكل سلبياته، ومبيغيرش منه حاجة بصراحة الراجل يشكر إنه مبيحطتش "التاتش" بتاعه في زيادة سوء الفيلم، هو بيظهر بس يرمي كلمتين علشان يحس إنه منتج بس، مصدر سيناريوهات ومشاهد أفلام السبكي هتلاقيها في حاجات كتير.. مثلًا: كومنتاتك اللي طول النهار تشتم فيها وتتريق ولموأخذة "تحك بكلامك مع كل واحدة رامية كلمتين قبلك" مش معنى كده إن كل البنات ملايكة أو كلهم وحشين، لا طبعًا صوابعك مش زي بعضها وكل حاجه فيها أذواق وأشكال وانت وذوقك وكل إناء ينضح بما فيه. فيه برضه مصدر للسبكي، "تويتاتك" اللي طول النهار بتكتبها وتنتهك حرمات أي حد مخالفك الرأي ودي كارثة عايشينها، برضه "اليوتيوب" دلوقتي أي حد ماشي في الشارع ممكن بعد 5 دقايق يكون بطل فيلم على اليوتيوب، والدنيا كلها تضحك وتسخر منه سواء كان الموقف بقصد أو بدون قصد، والغريب إنك تشوف واد بيصور بنت مع اختلافي معاها فكريا وأدبيا، وميمنعش الواقعة والتعدي عليها من غير ما تحس؛ لأن ده تعدي على حريتها وانتهاك خصوصياتها، زي ما بينادوا بالديمقراطية.. أيوه هي دي الديمقراطية "أنا حر ما لم أضر"، وبعدين انت تطلع ايه علشان تصورها أو تصوره وتشهر بيه. نرجع لموضوعنا السبكي بيجمع خليط البذاءه في الألفاظ والأفعال دي كلها وبيعملها فيلم، أفلام السبكي كتير ومغرقة السوق وبتتعرض للقرصنة علشان عارفة سكتها وزبونها زي: "بون سواريه - الألماني – قلب الأسد – عبده موته – الفرح – أيظن – كباريه – القشاش – (وأخيرًا وليس آخرًا) "حلاوة روح"، أنا أسف يا جماعه "القشاش" مش من انتاج السبكي بس السبكي بقى أسلوب حياة، وده معناه إن السبكي ناجح والناس بيقلدوه وبيعملوا زيه. السبكي ليه مقولة شهيرة جدًا بيقول: الفلوس فلوسنا.. وانا عارف الناس عايزه ايه، ولو ركزت في الكلمتين بتوعه مع الكلمتين اللي انتا أو انتي قريتوهم هتلاقي نفسكم ومن غير ما تحسوا بتساعدوا السبكي في أفلامه "بفيديوهات - كومنتات - تويتات - بوستات.. إلخ". الحمد لله إن في ناس لسه فيها الروح وعايشه وبتقول "كفاية إسفاف" أحب اشكر الشباب دوول وبيهم مصر بخير. ملحوظة: السبكي أو غيره ميقدرش ينزل بالمستوى البذئ ده إلا إذا كان احنا ده مستوانا فعلًا، وهو مطمن وعارف انه لو عمل فيلم فاضي وفيه رقاصة وبلطجي قاعدين طول الفيلم، والكاميرا عليهم الناس هتدخله وتجيبله إيرادات؛ لأن ده تفكير معظم الشباب ودي بقت أخلاقنا وهو عارف يدخلهم منين علشان يجيبهم.. ربنا يستر لأن المستهدف هو جيل المستقبل.. "إنما الأمم الأخلاق ما بقيت فإن هُم ذهبت أخلاقهم ذهبوا".
