يعني الدنيا تقفل في وشك وانت شايفها مفتوحة وليها ألف باب وباب، يعني تخرج من نقرة تقع في دحديرة وانت بتضحك ومستني الطريق يتمهد، يعني تعافر في دنيتك وتشق طريق كل شوية بيتسد ومتزهقش. يعني تفضل تسعى وتجري ورا حاجات كتير ومع ذلك متبقاش نصيبك، يعني يبقى نفسك في حاجة قوي وأول ماتقرب خلاص منك فجأة تطير، فتدورعلى غيرها وتحلم بيها من جديد ومتوقفش سعي ولا جري ورا أحلامك اللي واثق إنها في يوم هتبقى حقيقة.(ليس كل ما يتمناه المرء يدركه وتأتي الرياح بما لاتشتهي السفن). يعني تحسن النية وتعامل الناس بكل ودّ وحب وتلاقي قسوة وجفا، فتفضل تحب ومتبطلش حب عشان متأكد إن لسه في الدنيا ناس تستحق الحب ده. يعني تصحى الصبح وتقابل يومك بابتسامة عريضة ورغم كده كل الأحداث تكشر في وشك، فتضحك أكتر في وش الحزن وتاخده كمان بالحضن رغم إن الدمعة نازلة من عينك. يعني المستقبل دايمًا يكون مجهول، ورغم الخوف من المجهول إلا إنك راسم ومخطط إنك تعيش أحلى حياة. الأمل يعني رغم كل الصعوبات تفضل تتعب عشان تعيش وتحقق هدفك، يعني مش مجرد كلام بتردده بدون عمل ولا وهم، عايش جواك ومعشش في خيالك، الأمل أقوى دافع للصبر، وأنسب وسيلة لتحقيق أي حلم مهما كان مستحيل هوالضمان الوحيد للوصول ليه. يعني حاجات كتير قوي تحاول تحبطك بس انت مببتأثرش، يعني تحلم دايمًا لبكرة حتى لومش ضامن إنك تعيش ثانية قدام، يعني تكون متفائل على طول الخط مهما كانت الأحداث حواليك كئيبة، يعني تبقى واثق إن ربنا بيبعد عنك الكويس - من وجهة نظرك - عشان يهديك الأحسن على الاطلاق. يعني كلام كتير إتقال ولسه هيتقال عن إحساس ممتع و جميل إنه يتعاش ...المهم إنك تعيشه، واتأكد إنه مش صعب تلاقي الأمل دور بس عليه جواك.