شعب أزمات وحروب وكوارث. شعب حويط.. ساعات يعمل عبيط عشان ما يشوفش نفسه فيتنمرد. بنحب الموت شجاعة: اخترعنا «العديد». بنحب الحياة تناكة: «وبلدنا ع الترعة بتغسل شعرها». بنغنى عشان نقاوم: «جانا نهار ما قدرش يدفع مهرها». ما ننساش تارنا حتى لو كسبانين: «لا تصالح». بنقفل الضحكة بدموع: «اللهم اجعله خير». لغز.. ولعنة ع اللى يفكه: إيه فرعنك!. شكلنا غلابة، وساعة الخطر قبرين: «شعبك أصيل والخصم عايب». بنخوف الدنيا عشان ما بنتفهمش بسهولة: تحبنا.. تكسبنا. لا نووى ولا بترول ولا دهب، والدنيا طمعانة فينا. محطوطين فى «اختبار»: ربنا بيحبنا. مش هنضيع: بنحرس ملكوته. لو رسمت الكلام ده «لوحة».. يطلعلك وش «عسكرى» مصرى.