عزيزى خالد 11 فبراير 2011.. المشهد صاخب فى ميدان التحرير. أقف وبجوارى زوجتى وقد هلكت يداها من شدة التصفيق وبجوارنا أبنائى زياد ومريم يحاولان استيعاب مساحات الجنون التى تحدث حولهم . أرى نفسى فى مقطع آخر من الذاكرة وأنا أصعد منزل كوبرى 6 أكتوبر من ناحية الشهيد عبد المنعم رياض وأنا أجرى بأقصى سرعة فى عكس اتجاه السيارات ممسكا بعلم مصر وأنا أصيح فى جنون استكمالا لما يحدث..ارفع راسك فوق أنت مصرى.وقتها سمعت مريم وهى تقول الحقوا بابا اتجنن! .. جميعنا فى هذا اليوم كنا مجانين! معقولة؟؟معقول تعبنا كله جاب نتيجة؟؟ مئات بل آلاف الرسومات التى رسمتها ضد مبارك وسياساته البغيضة ..بدءا من قفاه على غلاف مجلة اليسار عام 1998 وفيما بعد فى جريدة الدستور عام 2005 ثم فى المصرى اليوم..وقبلها فى جريدة العربى الناصرى والأحرار والأسبوع ومصر الفتاة..ومئات المظاهرات التى سرنا فيها..والاحتجاجات .وقنابل الغاز.. ورعبى من أمن الدولة فى طلعة كل شمس خرجت فيها هذه الرسومات للنور..معقولة كل ده جاب نتيجة؟؟..ومبارك بح؟؟؟ صحفى فرنسى يسألنى :رسامين الكاريكاتير فى أمريكا اللاتينية يتذكرون ببالغ الأسى أيام الديكتاتور ويقولون إن أفضل كاريكاتير رسموه فى حياتهم كان أيام الدكتاتور.. مش حتندم على أيام مبارك؟؟؟ لا طبعا.أندم مين ياعم.أنا مستعد من بكره أرسم عن الحب والخير والجمال ولا تقطف الزهور. ولا تعبر الطريق والإشارة خضراء..بس مصر تبقى كويسة! تعبر فى ذهنى عبارة قالها لي عبد الله كمال مداعبا وقت أن فاز الإخوان فى انتخابات مجلس الشعب ب88 مقعدا فى حدث اعتبرناه جميعا وقتها أنه انتصار للمعارضة كلها "خربتوها يا خويا" رددت عليه مبتسما وأنا أصعد بسرعة على سلم مجلة روز اليوسف"بقى إحنا برضه اللى خربناها؟".. وقتها كان هو رئيس تحرير مجلة وجريدة روز اليوسف وكنت أنا وقتها رئيس قسم الكاريكاتير فى جريدة الدستور.. و رئيس قسم الكاريكاتير فى مجلة روز اليوسف ايضا! "أيوه بس المشكلة إن لو مبارك مشى الإخوان حييجوا" "مش مهم.. المهم أى تغيير والسلام. إحنا خلاص مرارتنا اتفقعت" كثيرا ما كان تدور الحوارات بينى وبين أصدقائى حو ل هذا المنطق العبيط !! 11 فبراير 2012 مر هذا اليوم باهتا.. سبقه مصادمات بين شباب الإخوان وشباب الثورة.. بعد أن نجح الإخوان فى حشد الميدان فى 25 يناير 2012 احتفالا بثورة يناير وسط إصرار من شباب الثورة على أن الثورة لم تستكمل أهدافها بعد.. ألتفت لبلال فضل ضاحكا ونحن نشاهد بروفات صفحة المعصرة سويا فى جريدة الشروق: تفتكر فعلا مبارك زى ماأنت كاتب مستنى لحظة إنه يسمع بودنه الناس وهيه بتقول ولا يوم من أيامك يا حسنى.؟ ما كتبه بلال وقتها كان عبارة عن مشهد درامى رائع عن مبارك وهو يرفض الموت ويصر على العناد مع ملك الموت إلا بعد أن يشنف أذنيه بسماع "ولا يوم من أيامك يا حسنى"! 11 فبراير 2013 لا أعرف ماذا فعلنا بمصر؟ هل فعلا خربناها زى ما قال عبد الله كمال مداعبا؟؟. أحد أصدقائى اعترضه أحدهم فى عرض الطريق قائلا : منكم لله خربتوا البلد! يندهش الأصدقاء فى الشروق من رأسى وقد اختفى منها الشعر تماما .. أهمس : أنا اللى قلت للحلاق يخليها ع الزيرو.. ربما يكون جزء من عذاب الضمير. حاسس إن إحنا اللى جبنا الكلاب دول للحكم.. معقولة يكون مبارك كان عنده حق لما كان بيعتقلهم؟؟ فى الأمثال الشعبية يقولون "يعمل من الفسيخ شربات" معقولة نكون عملنا العكس؟ معقولة نكون عملنا من الشربات فسيخ؟؟ معقولة عيون الثوار وأرواح الشهداء والورد اللى فتح فى جناين مصر يتحط فى الخلاط من الناحية دى يطلع من الناحية التانية إخوان؟؟؟ أصارح الأديب الرائع والصديق الجميل محمد المخزنجى "أنا عارف إنك طبيب نفسى فى الأساس يا دكتور علشان كده أنا عايز أصارحك بحاجة. أنا على شفا الجنون يا دكتور.. إنت عارف أنا باعمل إيه ؟؟ أنا باقفل قزاز العربية فى رحلتى يوميا من المهندسين للشيخ زايد وأنزل شتيمة! باشتم أى حد أشوفه معدى قصادى.. بشتم اللى فى العربيات ... اللي فى المحلات. اللى بيعدوا الشارع.اللى ماشيين على رجليهم.. بشتم بعنف لأنى باحس إن دول كلهم بغبائهم هما اللى جابوا الإخوان.. هما السبب فى اللى إحنا فيه..هما اللى خلوا البلد ضاعت.. وأضيف ضاحكا: لأ وإيه يا دكتور بستمتع جدا بتركيبات الشتيمة اللى بتطلع معايا.. تركيبات غريبة جدا يا دكتور..عارف بعد كده.. بدخل البيت مبتسم وهادى جدا .. لو ما عملتش كده حأنفجر فى البيت ! 11 فبراير 2014 عدت أصر على "ارفع راسك فوق إنت مصرى", وأصمم على "عيش حرية عدالة اجتماعية كرامة إنسانية" ملعون أبو الإخوان ألف مرة.. ورقصنى ياجدع! عمرو سليم رسام كاريكاتير
