كل سنة وانتوا طيبين، وبعودة الأيام، طبعا كلكم مستغربين فيونكاتى، وألوانى، وفورمة فروى اللى تجنن، والشوز بتاعى اللى مزغللة عينيكم، دى طبعا جيَّالى هدية من خروف صاحبى «من بيت عمنا شيمون بيريز» على فكرة ده صناعة فرنساوى مخصوص على مقاسى..مش ده موضوعنا، أنا طبعا دورى كخروف رئاسى .. ماااااء أن أهنى كل خرفان الدولة بعيد «الأضحى الكريم» مش المبارك، وأكيد طبعا بما إنى خروف مااااااااء... زيكم فأنا أكيد حاسس بمشاكلكم ومخاوفكم، إنتوا بقالكم كتير بتحلموا بقدركم اللى مستنيكوا على إيد جزارين الدولة، وكلكم بلا شك بتكرهوا الناس اللى اشتروكم، أحب أطمنكم فأنتم أهلى وعشيرتى، وها أنا ذا فاتح إليكم ذراعى، لأضمكم وأطمئنكم على حالكم، وحال أبنائكم وذويكم، فقد ورد لعلمنا أنه نظرا لظروف قهرية بالبلاد «حالة من حالات التقشف» سيمنع ذبح الخرفان هذا العام، وده طبعا لقلة عدد الروس مننا ماااااء . الرياسة رأت أن كل سنة بيتدبح مننا كتير أوى، وغير كده كلنا عارفين إن ده شعب ما يستاهلش إننا نرسم على وشه الفرحة فى العيد أصلاً، قال إيه بيعتبوا على رئيس الدولة إنه ما التزمش معاهم بوعود ال 100 يوم ماااااااء ... الناس دى لو بتفهم كانت عرفت إن الخروف مننا عشان يكون خروف «ملو فروه»، بيتغذى ويتربى يجى سنه مش100 يوم، غير كده هو فى حد فى الدنيا منجههم زييه، ولا وشوا اللى كان حلو عليهم ورفع منسوب النيل متر ونص، لأ وإيه البورصة بقت بتكسب مااااااااااااااء .. ماااااااااااء .. «مانجا يا مانجا» دول لو بيفهموا كانوا سكتوا وسابوا الراجل يشتغل، وبعدين هما زعلانين إنه جاب أهله وعشيرته حواليه، طب ما أنا أهو بكلم مين؟ ما أنا بكلم خرفان زيى مااااااااااء، أى نعم أنا خروف رئاسى وإنتوا لأ مااااااء، ، لكن إنتوا برضوا أهلى وعشيرتى، وبكلمكم أهو من غير حرس ومن غير واقى..ماااااااااء - يتلفت حوله فإذا بخروف يرتدى نظارة سوداء وسماعة فى أذنه يشير له أن ينهى الحديث سريعا. ماااااااااء... وف الآخر أحب أطمنكم إن علاقتنا بكل الخرفان فى كل الدول المحيطة ستبقى على خير حال، إنتوا عارفين كويس إنى متربى تربية دبلوماسية لا يمكن أنطح فى حد، ولو حد اتريق على قرونى، ببين له بياض سنانى... مااااااء... وكل سنة وانتوا طيبين.
