نورهان: خدعنى ورفض يزرع شعر بعد جوازنا لا يخلو يوم بمحكمة الأسرة من «دلوعة» تتقدم بدعوى خلع، لسبب تافه، يعكس تفكير تلك الفئة من البشر.. الزوجة «نورهان.م» 25 سنة، تريد خلع زوجها «كريم.أ» 28 سنة، بداع أنه خدعها لرفضه زراعة شعر رأسه، بعد أن وعدها بزراعته قبل الزواج. وتقول الزوجة فى الدعوى التى أقامتها «ضحك علىَّ وخدعنى بعدما كان وعدنى أنه هيزرع شعره بعد الزواج، ولكنى تفاجأت برد فعله ورفضه لزراعته لشعره واتهامه لى بأنى إنسانة تافهة وسطحية وبتاعة مظاهر، ونسى أنه كان وعدنى بحاجة ورجع فى كلامه». وأضافت «المسألة بالنسبة لى مبدأ، وهو عايز يلخص المشكلة بأنى بأحب المنظرة وتافهة، لكن المسألة كبيرة لأنى طلبت منه لما اتقدم لى أنه لازم يزرع شعره، عشان أنا مابحبش الرجالة القرع، وهو ساعتها وافق على طلبى وفهمنى أنه متفهم الموضوع ولازم يحترم رأيى، ووعدنى ساعتها بأنه هيزرع شعره بعد الجواز، لكنى تفاجأت بعد الزواج برفضه لطلبى وبيتريق علىَّ وبيتهمنى أنى تافهة ومش بأتحمل المسئولية، كل ده عشان طالبته بتنفيذ وعده لى، ولما زعلت وروحت عند أهلى راح على البيت عند أهلى وقالهم إنه مش هيقدر يزرع شعره عشان تكاليف العملية زادت عن أيام الخطوبة، وهو مكنش عامل حسابه على الزيادة دى». واستطردت «كنت صريحة معاه من البداية وقلتله أنى ما بحبش الرجالة القرع فإزاى أعيش مع راجل أقرع وأشوفه قدام عينيا ال24 ساعة، مش قادرة أستحمل منظره قدامى، كأنى متجوزة واحد أكبر منى ب20 سنة، لدرجة أنى بقيت مكسوفة أخرج معاه، أنا مش تافهة ولا سطحية بس هى المسألة مسألة أذواق وأنا ذوقى كده، وقلتله من الأول وهو ساعتها وافق ومقليش أنى تافهة ولا سطحية، بالعكس كان متشجعًا جدًا لرأيى وكان موافقنى عليه، لكن بعد الجواز اتغير معايا وكأنه بقى إنسان تانى ورجع فى كلامه ووعده لى، بحجة أن الأسعار كلها زادت وأنه مش معاه فلوس يعمل بها العملية بعد ما الجواز خد كل فلوسه». واختتمت «الدلوعة»: «عشان ما خربش بيتى بنفسى لما عرفت منه أن الموضوع موضوع فلوس، اتفقت معاه ولقيت حلًا وعرضت عليه بأنه ياخذ قرضًا من أى بنك ويعمل بيه العملية، لكنه اتهمنى بالجنون ورفض وقلتله إن فى ناس كتيرة بتاخذ قروض عشان تعمل عمليات تجميل أو تجيب عربية، ففيها إيه لما يأخذ قرضًا ويزرع شعره عشان يرضينى، لكنه رفض عرضى واتهمنى بالجنون والتفاهة، لدرجة أنى حاولت بكل الطرق أنى أحافظ على بيتى لكنه هو مش عايز يرضى بأى حل، عشان كده أخدت قرارى بأنى لازم أخلص من عيشتى معاه وأخلعه بعد ما ضحك علىَّ وخدعنى».