أعرب المخرج الشاب محمد دياب عن سعادته باختيار فيلم "يوم الدين" للمخرج أبو بكر شوقي للمشاركة في المسابقة الرسمية لمهرجان كان السينمائي الدولي، لافتًا إلى أنه يعتبر الفيلم من أروع وأعذب الأفلام العربية التي شاهدها في حياته، مؤكدًا أنه يستحق الترشح للأوسكار. وكتب "دياب" عبر "فيسبوك": "كنت من المحظوظين اللي شافوا فيلم المخرج ابو بكر شوقي "يوم الدين" اللي تم اختياره للمسابقه الرسمية لمهرجان كان، بدون مبالغة ده من أروع وأعذب وأحلى الأفلام العربي اللي شوفتها في حياتي!! لما قابلت أبو بكر من عشر سنين وأداني نسخة من فيلمه القصير اللي عن مريض في مستعمره جذام، قلبي ما طاوعنيش إني أشوف الفيلم، فلما عرفت انه بيحول فيلمه لفيلم طويل اعتبرت ده انتحار خاصه لما اختار بطل الفيلم مريض حقيقي بالجذام!!".
كنت شايف ده جراءة ما بعدها جراءة،، بس المفاجأه الكبيره لما شوفت الفيلم إني وقعت في غرام مريض الجزام وبقيت نفسي احضنه عبقريه الفيلم انه فيه كل العناصر اللي تحوله بسهوله لميلودراما بس ده عمره ما حصل تمكن حقيقي من عناصر الفيلم تخليك تضحك وتدمع وتستمع خلتني مش عاوزه يخلص. السنة اللي فاتت كنت عضو في لجنه تحكيم كان وشوفت 18 فيلم، وبالتأكيد الفيلم ده أحلى منهم كلهم وفعلاً يستحق يبقى في المسابقة الرسمية مع إن ده بيحصل قليل جدًا لمخرج أول مرة وأعتقد أول مره تحصل لمخرج عربي. واختتم كلامه: "إن شاء الفيلم ياخد جائزة مستحقة وعلى الأقل هتكون لبطل الفيلم "راضي جمال" لو الدنيا عادلة هنشوف الفيلم ده في الأوسكار، انتوا ضمنتوا صوتي في تصويت الأوسكار".
