نجح كريم عادل عبد الفتاح في صناعة إسمه ضمن اللاعبين البارزين في الكرة المصرية خلال مسيرته في الملاعب التي بدأها بقطاع الناشئين في الأهلي من 8 سنوات حتى سن 21 عاماً، وكان دائما ما يحصل على لقب هداف مسابقات الناشئين مع الأهلي في مختلف الأعمار، ولعب للعديد من أندية الدوري الممتاز، وشهدت فترة تواجدة بفريق الأوليمبي السكندري موسم 2008-2009 تألقه بشكل كبير مما دفع أكثر من نادي للحصول على خدماته، حيث لعب لأندية المصري والترسانة وسموحة والأولمبي وغزل المحلة وطلائع الجيش وجمهورية شبين واتحاد الشرطة حتى قرر اعتزال كرة القدم منذ أيام قليلة. وعن مسيرته في الملاعب التي إستمرت ما يقرب من 27 عاماً، وأبرز المحطات في مشوارة الكروي كان ل "الفجر الرياضي" الحوار التالي مع اللاعب .. - ما هي أبرز المواسم التي لعبتها بالدوري الممتاز ؟ أفضل المواسم في الدوري الممتاز كانت مع فريق الاولمبي حصلت حصلت على تالت هداف الدوري في موسم 2009/2008 حيث سجل فلافيو وبابا أركو 12 هدف، ونجحت في تسجيل 11 هدف بالتساوي مع أحمد عبد الرؤوف. - هل وقع الاختيار عليك في منتخبات مصر ؟ لعبت لمنتخب مصر للناشئين والشباب مع الغزال ابراهيم يوسف وشوقي غريب. لعبت دوري ممتاز وقسم تانى ما الفرق بين المسابقتين من وجهة نظرك؟ منذ سنوات كان في فرق كبير بين الدورين علشان الاضواء والشهرة والإعلام مكنش بيتابع غير الممتاز دلوقتي بعد ما القسم الثاني بيتذاع مبقاش في فرق وانا من وجهة نظري لاعيبة مصر كلها شبه بعض الفرق في الخبرات وثقة كل لاعب في نفسه، وأكبر دليل ان كل أندية الممتاز دلوقتي بقو بيدعمو أنديتهم للاعيبة من الممتاز "ب". رأيك في مبالغة بعض أندية المظاليم في المقابل المادى عند وصول عرض للاعب من الدوري الممتاز؟ والله الأندية الصغيرة بتبالغ في المقابل المادي علشان ممكن بيع لاعب من اللعيبة دي يحل مشاكل النادي كله، واكبر دليل للنجاح دا النادي المصري ونجاح حسام حسن في التعاقد مع لاعبين درجة تانية محدش كان يعرفها ودلوقتى بقي ليهم أسامي وخدو رابع دوري ووصيف الكاس. - أكتر مدرب اشتغلت معاه وطور من أدائك واستفدت منه ايه؟ في 3 مدربين عمري ماهنسي فضلهم بعد ربنا أول واحد ابويا الروحي مشير عثمانثم مؤمن سليمان وطارق السعيد وكمان مجدي طلبه. هدف لا تنساه في مسيرتك ومباراة لا تنساها والسبب ايه مباراة غزل المحلة وإنبي في المحلة كسبنا واحد صفر وانا اللي جبت الجول موسم 2009 - 2010 كنّا خسرانين الماتش اللي قبله من بترول أسيوط 1/2 في المحلة وكان البترول اخر فريق في الجدول وكان ماسكنا الكابتن محمد رضوان وقرر خصم عشرين الف جنيه من كل لاعب. ومجلس الإدارة بلغنا علشان شيل الخصم لازم نكسب انبي وهما كانو فرقة جامدة جدا وانا كنت قاعد احتياطي الماتش دا ونزلت اخر 25 دقيقة وأول لمسة جبت الجول دا والخصم اتشال. وطبعا جولي في الزمالك مع الاولمبي لما كسبنا الزمالك 1/3 في الكلية الحربية 2008/2009 من الأهداف التاريخية في حياتي. رأيك في اختيارات كوبر للمنتخب الأخيرة وهل المنتخب هيوصل كأس عالم ولا لا اتمني ان شاء الله طبعا ان ربنا يكرم ونصعد لكأس العالم، وبالنسبة للاختيارات انا عرفت المحترفين بس وهما كلهم متألقين وأفضل حالتهم، وان شاء الله يفرقو مع المنتخب ويتالقو مع المنتخب زي الأندية. سبب بعدك عن الكورة مؤخرا هل هو عامل السن ولا ايه السبب؟ لا خالص ناس كتير قالتلي لسه قدامك كتير مفهوم السن دا في مصر مفهوم خاطئ ممكن يكون لاعب عنده 36 ومتألق جدا وخير مثال محمد فضل وهاني سعيد وحسام عبد العال بس هنا في مصر اللاعب اول ما يعدي ال 30 سنة يقولك دا كبر خلاص مع ان ممكن يكون لاعب كبير في السن مجهوده اكتر من لاعب عنده 26 سنة ومؤثر اكتر من لاعب صغير. وسبب بعدي ان المجال بقي كله علاقات ومصالح وانا شايف ان بعض السماسرة (مش كلهم) سبب تدهور حال الكورة في مصر والواحد معندوش استعداد يبهدل نفسه علشان كده قررت الإعتزال. - ماذا بعد الإعتزال ؟ قررت الإتجاة إلى مجال التدريب والحصول على الدوريات التدريبية خلال المرحلة المقبلة.
