كشف المخرج علي عبدالخالق، عن اعتذار الفنان يحيى الفخراني، عن أداء شخصية الطبيب في فيلم "العار" والذي أداه الفنان الراحل محمود عبدالعزيز. وتابع من خلال حواره مع الإعلاميات مفيدة شيحة ومنى عبد الغني وسهير جودة في برنامج "الستات مايعرفوش يكدبوا" المذاع على شاشة "سي بي سي" أن: "العار ده ليه صة، وهو من تأليف صديقي محمود أبو زيد من أيام المعهد، وإحنا أصدقاء عيلة كمان، يعني عيلتي تعرف عيلته وأوقات بنبات عند بعض، وبنحكي دايما لبعض عن أفكار الأفلام اللي بتجيلنا، إلى أن جاءت فكرة فيلم العار وقالي إيه رأيك نعمله مع بعض، بس معظم شركات الإنتاج رفضت إنتاج الفيلم، وقالوا لأ ده فيلم فيه مخدرات وبلاش، فمحمود قال هنتج الفيلم هو وأتنين أصدقاء". وتابع عبدالخالق: "كان نور الشريف في البداية عارف إنه هيعمل الدور بتاعه، وبعد كده تم اختيار حسين فهمي، ثم كان دور الأخ التالت هيعمله يحيى الفخراني، وكان لايق عليه الدور ويبان إنهم أخوات خصوصا مع حسين فهمي، لكن لما قرأ السيناريو ومحمود قعد أتناقش معاه في آخر مشاهد الفيلم، رفض وقال: حسين بيعمل ونور بيعمل، وأنا مبعلمش، ومش هينفع لأن أنا بعمل دلوقتي بطولات وبتاع". يضيف مخرج الفيلم: "ابتدوا الموزعين يقولوا مش مهم مين هيعمل الدور التالت، كفاية نور الشريف وحسين فهمي دول فريق كبير أوي، فأنا من تعاملي مع محمود عبدالعزيز حسيت إنه ممكن يعمل كوميديا كويس، فقولت نجيبه، وكانت شروطه إن مفيش كلمة تتشال من السيناريو مقابل إنه يعمل الفيلم ده بأي فلوس". وأكد عبد الخالق، تحمس محمود عبدالعزيز لفيلم العار بمجرد قراءته للسيناريو واعتبره فرصة العمر بالنسبة له حيث كان يقدم من قبل أدوارا شريرة، ورومانسية، ليدخل بهذا الفيلم في سياق مختلف، وهو ما أكد المخرج علي عبدالخالق، قائلا: "رغم إن حجم الدور في الفيلم كان أقل الأدوار بس محمود كان منور جدا، وبعد عرض الفيلم وصله إن ردود أفعال الجمهور كلها بتقول عليه إنه هايل". لمشاهدة الفيديو اضغط هنا
