بحب واحد زميلي من الجامعة بقالنا كتير مع بعض واتفقنا على الإرتباط لكن بواجه مشكلة معاه خطيرة وهية انه من فئة إجتماعية أقل مني بكثير ودة عامل لية أزمة بلاقي نفسي ساعات ببقى مقفولة منه من بعض تصرفاته ( بلدي شوية ) ومعرفش حبيته ليه لكن حبيته .. وخايفة دة يأثر على علاقتنا لو إتجوزنا وفي نفس الوقت انا مش بفكر اسيبه لانه كمان هوة إتعلق بية وصعبان عليه .. ياريت استاذة نيفين تبلغيني الحل لأني محتاجة استقر بقى على حل وشكرا جدا ليكي . س . م فضفضة محررة الصفحة .. نيفين حجازي مفيش في علاقة ممكن تبقى علاقة زواج يتقال فيها ( صعبان علية ) انتي مش واخداه تخليص حق ولا هتتبنيه .. ده إنسان ومن حقه إنه يا إما يتحب بصدق ومشاعر حقيقية يا إما يتساب لواحدة تانية تعرف قيمته ويبقى هوة عندها الدنيا واللي فيها .. انما اللي بتقوليه ده حاجة صعب التعاطف معاها .. اسفة على حدة ردي لكن مفيش ابدا في علاقة ممكن تبقى جواز حاجة كدة .. بعدين انتي من دلوقتي بتقولي عليه بلدي ومش طايقاه .. طيب خلاص خلي البلدي في حاله وروحي للأفرنجي يمكن تلاقي نفسك معاه .. انتي حبيتي نفسك في العلاقة دي مش حبيتيه هوة .. حبيتي دور الدكتاتورة وانه دايما هيضطر يخضع لطلباتك بحكم حرصه هوة كمان على بقاء علاقتكم .. هوة كمان غلطان لان إحساسك دة تحديدا بيبان جدا أثناء التعاملات .. المهم .. انا شايفة ان دي علاقة غير متوافقة والأهم انك مش بتحبيه أصلا انتي حابة الحالة اللي الظرف معيشك فيها بس مش أكتر من كدة وانا متأكدة أنك أول ما هتقابلي شاب تاني من نفس مستواكي هتقولي للشاب دة باي باي .. بلاش ارجوكي تجرحي مشاعر حد وخليكي واقعية في مواجهة نفسك ودايما خليكي محددة ايه اللي انتي عايزاه لان مشاعر الناس مش محطة ولا تنفع تكون من الحاجات اللي من السهل نتهاون فيها .. ارجوكي فكري بشكل واقعي وعيدي حساباتك مش في معاملة الشاب دة .. لا .. في إزاي هتواجهيه بأن علاقتكم لا تصلح من الأساس . [email protected]
