وَمَن يَقْتُلْ مُؤْمِنًا مُّتَعَمِّدًا فَجَزَاؤُهُ جَهَنَّمُ خَالِدًا فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا طب ومن يقتل مسيحي ؟ هو ده إللي كل شوية باأكد عليه كل الشيوخ إللي بيطلعوا في الإعلام ويقولوا المسيحيين كفار دول دواعش .. بيمهدوا لليوم إللي هيقدروا فيه يدبحوا المسيحيين زي مادبحوهم في ليبيا مفيش مانع يقولوا إحنا إيد واحده ونيل واحد وأرض واحده لكن يرجعوا يقولوا المسيحيين كفار ومشركين وكتابهم مُحَرَّف ليه ؟ عشان من يقتل مؤمناً فجزاؤه جهنم " حرام يقتل مؤمناً " وبالمناسبة ده معناه إن بما إن بعض المشايخ شايفين داعش مؤمنين فلو جيشنا المصري العظيم سألهم نضربهم رداً على ذبحهم للمصريين وللا لأ هيقولوا من يقتل مؤمناً متعمداً فجزاؤه جهنم ... طب ومن يقتل كافراً ؟ فَإِذَا لَقِيتُمُ الَّذِينَ كَفَرُوا فَضَرْبَ الرِّقَابِ حَتَّىٰ إِذَا أَثْخَنتُمُوهُمْ فَشُدُّوا الْوَثَاقَ قَاتِلُوا الَّذِينَ لَا يُؤْمِنُونَ بِاللَّهِ وَلَا بِالْيَوْمِ الْآخِرِ وَلَا يُحَرِّمُونَ مَا حَرَّمَ اللَّهُ وَرَسُولُهُ وَلَا يَدِينُونَ دِينَ الْحَقِّ مِنَ الَّذِينَ أُوتُوا الْكِتَابَ حَتَّىٰ يُعْطُوا الْجِزْيَةَ عَن يَدٍ وَهُمْ صَاغِرُونَ . إذاً فتأكيد بعض الشيوخ على أن المسيحيين كفار ليس له إلا هدف واحد كريه وهو إباحة قتلهم وقتما تحين الفرصة وإلا فلماذا يتناسون هذه الآيات ؟ وجاعل الذين اتبعوك فوق الذين كفروا إلى يوم القيامة ثم إلي مرجعكم فأحكم بينكم فيما كنتم فيه تختلفون " نركز بس بعد إذنكم شوية " الذين اتبعوك فوق الذين كفروا أي أنهم ليسوا كفاراً وإلى " يوم القيامة " يعني مش شوية وخلاص مش فترة من الزمن وشكراً ليه ؟ لأن كلام ربنا مابيتبدلش وَتَمَّتْ كَلِمَتُ رَبِّكَ صِدْقًا وَعَدْلًا لَّا مُبَدِّلَ لِكَلِمَاتِهِ وَهُوَ السَّمِيعُ الْعَلِيمُ طب هل في آيات بتكفر المسيحيين ؟ لَّقَدْ كَفَرَ الَّذِينَ قَالُوا إِنَّ اللَّهَ هُوَ الْمَسِيحُ ابْنُ مَرْيَمَ ماشي ياسيدي إحنا مش بنقول إن الله هو المسيح .. الله هو المسيح معناها إن المسيح ده كان إنسان عادي وتحول إلى الله لأ طبعاً ده كفر إحنا بنقول كلام تاني آه إنت ممكن تستغربه كشخص غير مسيحي لكن المهم إنه كلام تاني مالوش دعوة بالآية دي بنقول إن " المسيح هو الله " وهو في فرق ؟ طبعاً في فرق المسيح هو الله معناها إن الله ظهر في صورة إنسان " تجسد " عظيم هو سر التقوى الله ظهر في الجسد مش المسيح هو إللي تحول لإله حاشا لكن الله من حبه لينا جيه بنفسه يخلصنا من عقوبة الموت الأبدي " حبه لينا أي لكل البشر مش للمسيحيين بس " المهم .. طبعاً كلام غريب وإنت مابتؤمنش بيه مش مشكلتنا دلوقتي تقتنع أو لأ المهم تقتنع إن القرآن ماكفرش المسيحيين . - طب إستنى في آية تانيه القرآن كفر بيها المسيحيي وواضحة وصريحة .. إيه هيَّ بقى ؟ - لَّقَدْ كَفَرَ الَّذِينَ قَالُوا إِنَّ اللَّهَ ثَالِثُ ثَلَاثَةٍ وَمَا مِنْ إِلَٰهٍ إِلَّا إِلَٰهٌ وَاحِدٌ وَإِن لَّمْ يَنتَهُوا عَمَّا يَقُولُونَ لَيَمَسَّنَّ الَّذِينَ كَفَرُوا مِنْهُمْ عَذَابٌ أَلِيمٌ ها ها ها وإحنا كمان بنقول كفر الذين قالوا إن الله ثالث ثلاثة مين قال إننا مش بنؤمن بإله واحد ! مين قال إن في تلاته والله واحد منهم ! لأ إحنا موحدين بالله وبنؤمن بوحدانيته وبنقول في صلواتنا كلها " الله واحد آمين " و " إلهٍ واحد آمين " وبالحقيقة نؤمن بإلهٍ واحد ... ده إحنا حتى بنعتبر إن موضوع الإيمان بالإله الواحد ده من البديهيات مكتوب " أنت تؤمن أن الله واحد حسناً تفعل .. والشياطين أيضاً يؤمنون ويقشَعِرُّون " يعني مش المهم إنك تؤمن إن الله واحد وخلاص لأن الشياطين نفسهم عارفين إنه واحد المهم إنك تعيش حسب هذا الإيمان وتكون أعمالك صالحة وكويسة وبنت حلال أومال إيه موضوع الثالثوث ؟ ده موضوع كبير مش قصتك إنت دلوقتي وللا آقولك هاآقولك وبإختصار شديد جداً المسيحيين بيؤمنوا إن الله واااااااااااااااااااحد ومش تلات آلهة هذا الإله الواحد موجود بذاته ناطق بكلمته حي بروحه بس كده إلا إنه مش 3 آلهة لكن إله واحد فقط طيب وهل في دليل على إن الإنجيل متحرف ؟ يحرفون الكلم عن مواضعه مثلاً ؟ دي مش معناها إنهم حرفوا الإنجيل لكنهم حرفوا الكلم عن مواضعه فسروه بمزاجهم ودول موجودين في كل الأديان ناس بيلووا عنق النص لخدمة أهدافهم وأغراضهم زي بتوع داعش إللي بيعتمدوا على قتلهم ودبحهم وحرقهم للناس على آيات قرآنية والمشايخ والأزهر بيقولوا لأ دول فاهمين الدين غلط وإحنا كأقباط مصدقين إن الإسلام دين سماحة وتعايش ورحمة للعالمين ومصدقين إن داعش يحرفون الكلم عن مواضعه . طب لو قلنا إن الإنجيل إتحرف ياترى هيكون إتحرف إمتى ؟ قبل نزول القرآن ؟ مثلاً يعني .. مستحيل وإلا ماكانشي القرآن نفسه شهد في أكتر من موضع لهذا الإنجيل بل وللتوراة أيضاً وَلْيَحْكُمْ أَهْلُ الْإِنجِيلِ بِمَا أَنزَلَ اللَّهُ فِيهِ وَمَن لَّمْ يَحْكُم بِمَا أَنزَلَ اللَّهُ فَأُولَٰئِكَ هُمُ الْفَاسِقُونَ . بقى هيكون إتحرف والقرآن هيقول إن أهل الإنجيل يحكموا بما أنزل الله فيه ! مش ممكن طب والآية دي كمان : وَآتَيْنَاهُ الْإِنجِيلَ وَجَعَلْنَا فِي قُلُوبِ الَّذِينَ اتَّبَعُوهُ رَأْفَةً وَرَحْمَةً وَرَهْبَانِيَّةً ابْتَدَعُوهَا مَا كَتَبْنَاهَا عَلَيْهِمْ إِلَّا ابْتِغَاءَ رِضْوَانِ اللَّهِ بقى هيكون متحرف وهيجعل في قلوب إللي إتبعوه رأفة ورحمة ورهبانية إبتدعوها إبتغاء لرضوان الله ! طب والآية دي كمان : وَقَفَّيْنَا عَلَىٰ آثَارِهِم بِعِيسَى ابْنِ مَرْيَمَ مُصَدِّقًا لِّمَا بَيْنَ يَدَيْهِ مِنَ التَّوْرَاةِ وَآتَيْنَاهُ الْإِنجِيلَ فِيهِ هُدًى وَنُورٌ وَمُصَدِّقًا لِّمَا بَيْنَ يَدَيْهِ مِنَ التَّوْرَاةِ وَهُدًى وَمَوْعِظَةً لِّلْمُتَّقِينَ " وبالمناسبة في آيات تانيه كتييييير " إذاً إستحالة يكون إتحرف قبل نزول القرآن طب يمكن بعديه ؟ :) إزاي والإنجيل مش عربي وبس ؟ ده مترجم لكل لغات العالم :) مين إبن الذين ده إللي لم النسخ إللي كانت في كل العالَم وحرفها وعمل غيرها ووزعها تاني :) وللا بلاش .. إزاي يكون محرف وكل النسخ في كل اللغات متطابقة " إلا في بعض الكلام إللي طبيعي يكون مختلف عشان الترجمة لكن هتلاقي المعاني واحدة في النهاية . وللا بلاش .. إزاي يكون محرف وفي مخطوطات أصلية بخط إيد كتابها الأصليين محفوظة في المكتبات العالمية وف أشهر متاحف العالَم وزمن كتابتها سابق للقرآن ؟ ! صديقي أنا مش كافر ومش هاأقبل إنك تسميني كافر أنا ليَّ إيمان مختلف عن إيمانك لكني مؤمن مؤمن بعقيدة مختلفة لكني لستُ بكافر إذاً على الإعلام على الأزهر على الجميع أن يكف عن تسمية المسيحيين بالكفار أو المشركين نحن أهل كتاب " مقدس " نؤمن بيه ونؤمن بالله الواحد خالق السماء والأرض ولنتذكر وَلَوْ شَاءَ رَبُّكَ لَجَعَلَ النَّاسَ أُمَّةً وَاحِدَةً وَلَا يَزَالُونَ مُخْتَلِفِينَ يعني الإختلاف مشيئة إلهية وهو في الآخر هيحكم بيننا فيما كنا فيه نختلف قُلِ اللَّهُمَّ فَاطِرَ السَّمَاوَاتِ وَالْأَرْضِ عَالِمَ الْغَيْبِ وَالشَّهَادَةِ أَنتَ تَحْكُمُ بَيْنَ عِبَادِكَ فِي مَا كَانُوا فِيهِ يَخْتَلِفُونَ . وأخيراً .. لا أنا أدينك ولا تدينِّي أدينك ليه وفي ديان مسيره يجي ف يوم يحاسبنا وأنا وإنت ياصاحبي نُدان مالاكشي دعوة بالمخاليق وسيب الملك للمالك ودين نفسك وماتدينيش مفيش إنسان يدين إنسان " رمزي بشاره "
