هبة أمام محكمة الأسرة: جوزي مليونير ومش بيصرف على عياله والمخدرات لحست مخه

«جوزي مليونير و مش بيصرف علي عياله».. بتلك الكلمات بدأت هبة رواية مأساتها داخل أروقة محكمة الأسرة مع طليقها وعدم إنفاقه على أولاده منها.
بدأت هبة حديثها ل "صدى البلد" قائلة:" المشكلة إنه مش بيصرف على أولاده خالص، وعندي منه جولان وياسين ومش بيصرف عليهم خالص بقاله أكتر من سنتين وحاولنا بالود نحل المشاكل دي لكن مفيش صلح حصل".
وأضافت الزوجة:" لدرجة أن الأولاد مش عارفين مين بابا وحارمهم من كلمة بابا، ولما عملت عملية لأبني برضو رفض يصرف عليه او يبص عليه، ورفعت عليه قضية فى المحكمة بدعوى مصاريف علاج والمحكمة حكمت لي بتلك المصاريف إلا أنه ممتنع عن الدفع".

واكد:" طليقي قام بطردي من مسكن الزوجية فى الشارع وعايشه مع والدتي فى منزلها، ومنذ أيام حكمت لي المحكمة بتطليقي فى أول درجة وقام هو بالاستئناف على ذلك الحكم، ولا أستطيع حتى الاتجاه الى تمكيني من شقة الزوجية للسكن فيها برفقة أولادي".

وأضافت الزوجة: "عائلة طليقي ده متيسرة جدا ومعاهم أملاك كثيرة، والمحكمة حكمت لي بنفقة 3 آلاف جنيه للأولاد بس هو ملاوع ومش بيدفع حاجة، ورغم امتلاكهم لأراضي وشقق فى مصر الجديدة وكذلك والدته اللى ورثت من والدها حاجات كتير، مدوخني فى المحاكم، وعملي انذار طاعة فى المحكمة وعملت ضده دعوى طلاق والأزهر أقر بكامل حقوقي كاملة، وهو مش عايز يديني حقوقي عقب طلاقي مطلقا".
وأوضحت:" هو مدوخني كل شوية فى المحكمة، وبسيب أولادي مع ماما اللى متكفلة بكل مصاريفهم من أكل ولبس وسكن، وانا مش بشتغل أي حاجة علشان أصرف عليهم".

وأكدت:" طليقي عمل ده كله بسبب شرب المخدرات، والفلوس الزيادة اللى معاه هى السبب فى ده وتخليه يجيب حشيش وأفيون وأشياء أخرى، وتخليه مش فى وعيه حتى يشوف عياله او يبص عليهم أو يكلمهم وعياله نفسيتهم زي الزفت".
وأضافت:" مفيش حد من أهله كلمه علشان يراعي ظروف بيته لكن امه هي اللى بتقوله اهم حاجة نفسك واعمل اللى انت عايزه وملكش دعوة بأي حد واعمل اللى انت عايزه".
وأوضحت:" مرة بكلم والدته علشان اقولها بنت ابنك فى المستشفى قفلت السكة فى وشي، ومش بتحب تشوفهم خالص، ولما بقولها أكتر من مرة على مصاريف أحفادها وأنه ابنها مش بيصرف خالص، ترد عليا وتقولي ارفعي قضية فى المحكمة واللي تحكملك بيه المحكمة هنديهولك".
وطالبت قائلة:" أنا بطالب بحق ربنا وعدله، وانه يصرف على عياله ويشوفهم ويعيشهم هيشة كريمة زي ما هو عايش، وهو فوق الملياردير وهو قدام المحاكم بيقدم أوراق لتضليل المحكمة بعكس الواقع، بس المحكمة فى الاخر بتحكملي بحقي ده".

" src=""