دايما بيحصلى عكس اللى انا عاوزه وباخططله، مع إنى بصلى الوقت بوقته وبدعى ربنا من قلبى!! أنا كنت اتكلمت فى جزء من الموضوع ده من فترة، لكن خلينا ناخد القصة من منظور تانى، بص.. الدنيا أو الكون ماشى بقوانين ثابتة ودى بتسرى على المسلم والكافر، زى ما الدكتور مصطفى محمود كان بيقول إنه لو مسلم وكافر وقعوا فى حمام السباحة، اللى بيعرف يعوم هو اللى هينجو بغض النظر عن ديانته، وده من أسمى آيات عدل الله فى الأرض، القوانين دى العلماء أفنوا حياتهم فيها لغاية لما اكتشفوها وجاتلنا على طبق من فضة، مش فاضل بس غير إنك تطبقها، هتلاقيها كتير زى قانون المقاومة والكارما والارتداد والانعكاس والجذب وغيرها، وعلى فكرة أغلبها مستمدة من القرآن الكريم والسنة النبوية. طيب برضه إيه سبب إنى دايما بجذب عكس اللى أنا عاوزه؟؟؟ا لسبب هو قانون كونى بيقول "ما بالداخل=ما بالخارج"، يعنى ما بداخلك من قناعات وأفكار يشكل عالمك المادى وحياتك، مثلا بنت شايفة إن الرجالة كلهم خاينين، دى قناعة بداخلها، هتلاقى القناعة دى عاوزة اللى يثبتها أكتر، فتلاقى البنت بتصاحب نساء فاشلين فى حياتهم الزوجية، تلاقى البنت بتسمع أغانى عن الخيانة، وبعد كدة زى أى بنت نفسها تحب وتتحب، فتلاقيها جذبت رجل خاين لحياتها، وهتلاقيها بعد كدة بتقول شوفتوا، أنا كان عندى حق، وهتقابل من النموذج ده كتييييييييير وهتفضل تلوم الدنيا وقسوتها وغدرها، وتندب حظها اللعين، وكل ده وهي مش فاهمة إن المشكلة فيها هي، بالظبط زى ما يكون عندك دش ولاقط قنوات إنت مش عاوزها، وانت عمال تصلح فى الريسيفر، صلح فيه بقى للسنة الجاية ولا هتوصل لتغيير، لأن المشكلة من فوق، من الاستقبال، اطلع اعدل طبق الدش، ودى برضه الدنيا اللى إحنا فيها، لازم تعدل الاستقبال بتاعك، نفس الكلام بقى للطلبة والموظفين، وتلاقى بقى ناس تصبر نفسها بجمل زى: - أصل ربنا عاوز كده. - أنا قدرى ونصيبى طول عمرهم كده. طبعا دى كلها حيل شيطانية علشان تفضل فى وضعك السيئ، فى ظاهرها إيمانى ولكن فى باطنها عدم معرفة مطلقة بالله، سوء ظن بالله، عدم فهم لأقدار الله، وكأنك طلعت عنده فوق وشوفت اللى مكتوبلك، ومن قمة عدل ربنا برضه إنه استحالة يغيرك إلا لو انت ابتديت تغير ما بنفسك من الداخل، وطبعا كلنا عارفين الآية الكريمة. الميزة بقى إنك لو غيرت ما بداخلك هتعيش فى جنة الدنيا، هتعرف ربنا حق المعرفة، هتلاقى الدنيا جاية تحت رجلك، ولا هيفرق معاك حاجة، لأنك حطمت القيود والسجون اللى كانت فى عقلك، وبإذن الله فى مقالات قادمة هتكلم عن بعض المعتقدات اللى محولة حياتنا للعكس. وهقول دلوقتى تمرين بسيط لحل الجذب العكسى: لو فى موضوع مضايقك من زماااااان ومش عارف تحله، اعمل عكس للأفكار، يعنى أى فكرة تجيلك اعمل عكسها فورا، ومن غير ما تسأل ليه.
