روت الإعلامية إيمان الحصري تفاصيل زيارتها مع الفنان مصطفى شعبان الي والدة شهيد كرداسة النقيب هشام شتا . وكتبت الحصري عبر حسابها علي موقع فيس بوك :" الحكاية بدأت برسالة من والد الشهيد النقيب هشام شتا (والنقيب هشام شتا للي ميعرفوش واحد من 14 ظابط و فرد شرطة استشهدوا في مذبحة كرداسة الشهيرة في 14 اغسطس 2013) بيحيكلي في الرسالة ان والده الشهيد هشام بعد ما شافت فيلم اسمه كود 36 بطله الفنان مصطفي شعبان واللي في شبهه كبير جدا جدا من ابنها الشهيد". وأضافت :" بالصدفة كمان في الفيلم ده كان عامل دور ظابط شرطة بدأت تبكي بحرقة وتنادي عليه وتحضن الشاشة وتقول ده هشام !! وهو نفسه يسعدها ويفرح قلبها ولو لدقائق فلو ممكن ان مصطفي شعبان وانا نزورها في البيت لانها لو شافته هتشوف فيه ابنها وهتبقي سعيدة ودي أمنيه لها بس هو بيبعت الرسالة من وراها عشان لو وافق تبقي مفاجأة ولو رفض ما تزعلش.. انتهت الرسالة". وتابعت الحصري :"وصلت لمصطفي شعبان اللي كان صعب الوصول اليه عشان بيصور شغل رمضان ومن غير تفكير او تردد الحقيقة اول ما عرف الحكاية وافق علطول علي الزيارة وكان متحمس جدا وحددنا الميعاد مع والد الشهيد اننا هنروح النهاردة ". واستكملت :" الأب قرر يعملها مفاجأة للأم وفهمها ان زملاء هشام (الله يرحمه)جايين يزوروها وكانت محضرة سفرة كامله احتفالا بيهم.. الحقيقة المشهد اللي فتحت فيه الباب ولقت قدامها مصطفي شعبان والله العظيم مش لاقيه اي كلام يوصفه !! بس ممكن كل واحد يتخيل حجم المفاجأة والدهشة والدموع والوجع والفرحة والألم والامل لأم اعتقدت ولو لدقائق أن ابنها عاد الي حضنها".
