نشرت الإعلامية إيمان الحصري، صورة تجمعها بالفنان مصطفى شعبان، ووالدة الشهيد النقيب هشام شتا، والذي استشهد في مذبحة كرداسة الشهيرة في أغسطس 2013. وعلقت الحصري، على الصورة التي نشرتها بصفحتها الشخصية بموقع التواصل الاجتماعي "فيسبوك" قائلة: "الحكاية بدأت برسالة من والد الشهيد النقيب هشام شتا بيحكي في الرسالة إن والدة الشهيد هشام بعد ما شافت فيلم اسمه كود 36 بطولة الفنان مصطفى شعبان واللي في شبه كبير جدا من ابنها الشهيد وبالصدفة كمان كان عامل في الفيلم دور ضابط شرطة بدأت تبكي بحرقة وتنادي عليه وتحتضن الشاشة وتقول ده هشام، والد الشهيد كان عاوز يسعد أم الشهيد ويفرح قلبها ولو لدقائق، فطلب مني أني أزورها بصحبة الفنان مصطفى شعبان في البيت لأنها لو شفته هتشوف فيه ابنها، وهتبقى سعيدة ودي أمنية لها، وأنه بعت الرسالة من وراها عشان لو وافقت تبقى مفاجأة ولو رفضت متزعلش، والرسالة بتاعته انتهت على كده". وأضافت: "وصلت لمصطفى شعبان اللي كان صعب الوصول إليه عشان بيصور شغل رمضان ومن غير تفكير أو تردد الحقيقة أول ما عرف الحكاية وافق علطول على الزيارة وكان متحمس جدا وحددنا الميعاد مع والد الشهيد إننا هنروح النهاردة، الأب قرر يعملها مفاجأة للأم وفهمها إن زملاء هشام (الله يرحمه) جايين يزوروها وكانت محضرة سفرة كاملة احتفالا بيهم، الحقيقة المشهد اللي فتحت فيه الباب و لقت قدامها مصطفي شعبان و الله العظيم مش لاقيه اي كلام يوصفه، بس ممكن كل واحد يتخيل حجم المفاجأة والدهشة والدموع والوجع والفرحة والألم والأمل لأم اعتقدت ولو لدقائق أن ابنها عاد إلى حضنها".