ملامحة البريئة توحى بطفولة لم يعشها الصبى ذو الثلاثة عشر عامًا، حيث كان يجب أن يكون فى الصف الأول الإعدادى، ولكن ظروف الأسرة ووفاة الأب دفعاه للنزول إلى سوق العمل ليساعد والدته فى الإنفاق على إخوته الأصغر منه. عامر محمد عامر، يعمل صبى فى ورشة لصناعة مراكب الصيد حتى يتم تأهيله ليصبح "صنايعى" فى سوق العمل بعد أن كان يحلم بدخول كلية الهندسة ليحقق حلمه وحلم أبية بأن يصير مهندسًا. فى ورشة لتصيع سفن الصيد بمدينة عزبة البرج بدمياط التقت "البديل" بالصبى عامر، أثناء عمله تحت يد أكثر من خمسة من "صنايعية" الورشة، وهو يجهز المعدات وإحضار الطعام من المطاعم وشراء ما يلزم من خامات خفيفة، وأيضا يمسك مع الصنايعية عند تركيب وتجميع أجزاء المراكب. وقال عامر، "أنا الكبير بين إخوتى الثلاثة واللى بعدى محمود فى خامسة إبتدائى، وسلوى فى تالتة إبتدائى، بابا كان دايما يقولى هتبقى مهندس علشان تبنى لنا بيت كبير وأنا كنت بحلم أبقى مهندس علشان أحقق لبابا حلمة، بابا كان بيشتغل صياد على مركب فى العزبة لكن جاله فيرس "سي" بالكبد وتعب وقعد سنتين ما يروحش الشغل من التعب والعلاج، وإحنا ملناش أى دخل غير شغل بابا على المراكب فى صيد السمك، والحالة بقت صعبة علينا وبابا مات من سنتين بعد ما قعد فى البيت سنتين من غير شغل كان صاحب المركب بيعطينا مصروف وماما كانت بتجيب خضار وتبيعه وبعد موت بابا خرجت من المدرسة وكنت فى سنة خامسة إبتدائى وجيت إشتغلت فى الورشة مع المعلم أحمد علشان أساعد ماما فى مصروف البيت". وعن طبيعة عمله يقول عامر "أنا باجى الورشة الساعه 7.30 أجهز العدد وأرتبها وأجهز الخامات اللى الأسطى قالى عليها من امبارح وبعدين أروح أجيب الفطار للصنايعية، علشان ييجوا الساعه 8 يفطروا ويبدءوا الشغل، وأنا بنفذ اللى بيطلبوه منى وبمسك عليهم علشان أتعلم وأبقى صنايعى زيهم فى يوم من الأيام ،ويضيف عامر بنخلص شغل الساعه سابعة بالليل وأنا ألم العدة وافصل كابلات الكهربا عن الماكينات وأخزن العدد اليدوية فى المكان الخاص بها واروح أتعشى فى البيت وأخرج ألعب من أصحابى شوية وبعدين أروح أنام علشان أصحى بدرى أجى الورشة ويوم الخميس آخد القبض بتاعى أعطيه لأمى " أحمد راضى، صاحب الورشة، يقول ل«البديل»: أن الورش دائما تحتاج إلى صبى لقضاء مشاوير الورشة والإمساء على الصنايعية وعامر لما إشتغل معانا من سنتين ,إحنا عارفين ظروفه كويس والعمال فى الورشة بيعاملوه بطريقة كويسة وبيحاولوا يعلموه علشان يتقدم فى الصانعة وبالتالى أجرته تزيد علما بأن الصانعة بتاعتنا بتاخد وقت فى تعليمها مش أقل من عشر سنين .