دخل الربيع يضحك لقاني حزين .. نده الربيع على اسمي لم قلت مين .. حط الربيع أزهاره جنبي وراح .. وايش تعمل الأزهار للميتين .. من أول ما بدأ لفظ "الربيع العربي" في التداول بين الناس وإعلاميا وأنا بترن في وداني الرباعية دي بتاعة عمنا جاهين .. الحقيقة ان الربيع دايما قصير وبيجي بعده الصيف بحرارته وشدته وبعده الخريف بشيبته وهدته ونختم بالشتاء وبرده وقفل الببان على البيوت وشعاع الشمس يبقى خيط عنكبوت .. والحقيقة ان في عالمنا العربي وزي اي دوران طبيعي للأرض حوالين الشمس بيجي الربيع كل "عام" ، ما كانتش أول مرة تفتح الورود ويتجدد الأمل .. الإشكالية الحقيقية هي اننا في كل مرة ما كناش بنحط ايدينا على مربط الفرس وسبب الرحيل .. الجنايني ولا الخواجة ! الجنايني اللي بيسقي الزرع وبيكون السبب المباشر في موت الورد بدري بدري وبيحفر الأرض وبيوزع الميه ، ولا الخواجة صاحب الوسية اللي خدها من اصحابها بالقوة من سنين فبيعين الجنايني أصلا على مزاجه .. في كل مرة نضرب الجنايني ونقوله انت مابتفهمش ، وببساطة الخواجة يضحك ويجيبلنا جنايني غيره .. بس كدة يا بيه المشكلة في الخواجة! هو اللي معاه مفتاح الهاويس وهو اللي بيحكم الجنايني وفي ايديه خرايط الترع والمصارف ومن بلكونة قصره العالي شايف كل برعم بيطلع فين وامتى وازاي .. زمان من زمان حبتين في بلدنا فتحت ورود وقامت وطردت الجنايني واختارت قائد كان اسمه محمد علي باشا .. صحيح هو قص من الورود وانقلب على اللي شالوه فوق الكتاف بس كان جنايني محترف مش تبع الخواجة وجه بعيد عن رغبته ونقل الربيع للعالم العربي وفتح الترع على المنطقة كلها وراح بجيشة للجزيرة العربية والشام "كان ربيع عربي" بس الخواجة ماعجبوش وقف وقفة شديدة مافيهاش هزار وخنق الورد وهد الحلم وقسم البلاد والعباد وبعدها بشوية جه بعساكره قال والله لاقعدلكم فيها وحول مجرى الترع على هواه وخد العيال الصغيرة فتحلهم "مدارس شبه عمود الكتاب" بس افرنجية علمهم اللي عاوزهم يتعلموه خلاهم يدوروا في فلكه ويتكلموا بلسانه .. مش بس كدة دة الخواجة بنا بيت في ارض الجنينة وطرد اصحاب الأرض منه وقال هفضل شوكة في قلبكم كل ما تحاولوا تفوقوا هعرف اضربكم منين واتوهكم .. من زمان برضه بس مش زمان أوي فتحت ورود وظهر قائد جديد كان اسمه جمال عبد الناصر .. صحيح هو برضه قص من الورود وانقلب على اللي شالوه فوق الكتاف بس كان جنايني محترف برضه مش تبع الخواجة وجه بعيد عن رغبته ونقل الربيع للعالم العربي وفتح الترع على المنطقة كلها وراح بقوته وسيطرته للجزيرة العربية والشام "كان ربيع عربي" .. بس الخواجة ماعجبوش وقف وقفة شديدة مافيهاش هزار وخنق الورد وهد الحلم وقسم البلاد والعباد وبعدها بشوية جه بعساكره قال والله لاقعدلكم فيها وحول الترع على هواه وخد العيال الصغيرة فتحلهم "مدارس شبه عمود الكتاب" بس افرنجية علمهم اللي عاوزهم يتعلموه خلاهم يدوروا في فلكه ويتكلموا بلسانه .. وبدأ الخواجة يبني متاريسه في الخليج ويهد العراق ويصنع تحالفاته هنا وهناك .. ويعيد التاريخ نفسه .. الخواجة مش عاجبة ان الشباب عاوز يقوم.. ازاي ! من 2011 وهو بيستغل كل اللي بناه في السنين عشان يوقف الربيع .. ياخبيبي انت سني ودة شيعي لازم موت بعضيكم .. يا خبيبي خلايب ارض سوادني .. يا خبيبي إيران دة خطر كبير على منطقة بتاعك .. يا خبيبي مين يهكم مصر سلفي ولا اخوان ولا عسكر ولا … ياخبيبي سوريا مش فيها ديموقراطية لازم بشار امشي .. سعودية مش فيها ديموقراطية ؟! سعودية دولة صديقة جميل .. قال الكلمتين ووقف يتفرج .. دم في كل حتة .. وسلاح بيوصل لتجار الدم .. يا باب ايا مقفول امتى الدخول .. صبرت ياما واللي يصبر ينول .. دقيت سنين والرد يرجعلي مين ؟ لو كنت عارف مين أنا كنت أقول .. عجبي ..