التريند النهاردة إيه؟ السؤال ده بقى هو "صباح الخير" لكل متابعي السوشيال ميديا مع إشراقة كل يوم جديد.. (1) مع "النوتفيكاشين" والرسائل اللي جايه ورا بعض بتكسر صوت الفيديو أو ال"لايف فيديو" صاحبنا قاعد يسمع لواحدة من المشاهير أو زي ما بنسميهم influencers "المؤثرين" وهي بتتكلم علي الlive وبتدافع عن طفلة تعرضت للاغتصاب والحوار اتقلب شتايم وإهانات، وبعدها يسمع واحد بيرغي عن أنه عاش تجربة cast away بس في المعادي والحمد لله رجع بيته في مصر الجديدة بعد ما تدخلت فرق الإنقاذ المتمثلة في أكشاك ميادين المعادي. رد فعل: رمى التليفون وشد السيفون (2) عزيزي اللي مهووس بواحدة instagram's star فيه آلاف بيتابعوها ويبقلدوها وانت فاكرها شخصية ناجحة ومؤثرة، وانت مش مدرك إنها بتعمل كل ده عشان الشهرة والإعلانات مدفوعة الأجر ومش فاهم إنك انت وغيرك مجرد رقم بيزود دخلها وفلوسها "لامؤاخذة على قفا انبهارك بيها".. يا ترى بعد مافهمت هل تقبل على نفسك إنك تكون مجرد رقم في خانة شخص لا يستحق؟ عزيزتي المولعة بالشابة الجميلة اللي على face book مش معنى إنها كلت من المطعم ده إنك لازم تروحي تاكلي فيه، لأنها خدت فلوس عشان تمشي واحدة زيك لهناك والمطعم لا حلو ولا حاجة وممكن يكون مش عاجبها أصلا على فكرة بس أكل العيش خلاها تروح تتصور فيه وتقبض قرشين، ومش معنى إنها لبست اللبس ده انه يناسبك.. أبدا هي بس بتسوق لبراند او موضة معينة وعارفة إن وراها قطيع هينفذ. فياترى انتي قابلة تبقى من القطيع؟ (3) قل لي من تتابع أقل لك من أنت، مثلا في ناس بتابع سما المصري ومستنية برنامجها الديني في رمضان للسخرية أو الاهتمام! طبعا هتقولي إنا متباعها عشان أسخر وأشوف حالنا وصل لإيه؟ هقولك برضو انت رقم من ضمن الأرقام اللي بتخليها "انفلونسر" فخلي بالك بقى عشان انت سبب إنها هتعمل حاجات أكتر في المستقبل لأنك زودت قدرتها على التأثير وانت مش واخد بالك. طيب وغير النوعية دي تعالى نقف لحظات ونفكر سوا بصوت عالي، السؤال هنا هيكون، ليه؟ ليه انت متابع فلان وبتاخد منه معلومات؟ هل أصبح التعرف على مصدر المعلومات مبني ع الشهرة؟ هل أصبح التقليد الأعمي سمة شخصيتك؟ انت مش مدرك إن الطريقة دي دمرت مصداقية أي معلومة بيتم تداولها؟ ليه بقي أساس كلامك أصل أنا قريت عند مش عارف مين؟ أو شوفت فيديو بتاع مين قال فيه مش عارف إيه؟ أو فلانة كانت لابسة إيه امبارح ودي الموضة. خلق الله الإنسان حر عاقل مفكر، حريته قائمة على أساس أن لا ينساق وراء القطيع كما تساق الأغنام، كونوا كما أنتم واعملوا علي أنفسكم واتبعوا من يستحق أن يتبع لا من يتبعه الكثير، ولا تكونوا ك فرانكنشتاين مسخ تمت صناعته في معمل عالمي فخم. رد فعل: فنجان قهوة من إيد الحاجة مع فيلم في بيتنا رجل .. (4) إشراقة يوم جديد.. صاحبنا بتاع امبارح صحي في نفس المعاد بس مسألش السؤال إياه، وابتسم في وش الناس وقعد يحكي عن فيلم قديم أول مرة كان يشوفه اسمه "في بيتنا رجل" وكمان حكى عن الكتاب اللي قراه صاحبنا عمل التريند لنفسه فاشتري واحد من صحابه نفس الكتاب وشاهد الآخر نفس الفيلم اللي مكانش شافه قبل كده، الإقبال النهاردة تاريخي يا فندم. خليك انت المجتمع اللي انت حابه.. إياك والاستهانة بما تفعل أو تقول.. إياك تظن إنك صغير وغير مؤثر.. وتذكر دائما أن جناج فراشة في الصين قد يصنع إعصارا في جانب آخر من هذا العالم. تحرر واعرف أن الإله هو الذي تتبعه بتسليم لأنه الكمال المطلق فلا تتخذ من الإنفلونسرز آلهة لأنهم ليسوا كذلك.. رد فعلك :…….
