- صباح الخير يامولاي..حمدالله علي سلامتك من الغابات.. شوف سافروا معاك كام واحد ماوحشنا منهم واحد،لا لا لا ده انت وحشتنا بالذات. - صباح الخيرات ياشهرزاد..مالك قالبة علي نادية مصطفي كده..وحشتيني يا ملكة القصص والحكايات..سيبك من الفطار وقوليلي كل اللي حصل واللي فات..بس عايز حكاوي حلوة مفيهاش دموع ولا آهات. - هيهات يامولاي هيهات..خلاص مابقتش أقدر أعمل من الفسيخ شربات ! - بداية ماتطمنش ياست البنات كفاية نكد عايز أفرفش شوية،أكيد فيه جديد في عالم الحكايات وبلاش وحياة والدك حكاوي التعلب فات فات وفي ديله سبع لفات والكلب دوج والقطة كات. - أيوه صحيح يامولاي حصلت حكاية جديدة بطلها وزير مصري فشر حكايات النات كاونات. - قولي بسرعة قوام بس لو طلعت فنكوش وخرافات حاجيبلك مسرور السياف ونقرا الفاتحة علي عمرك اللي فات..أنا أصلا زهقت منك ومن صنف الستات! - بلغني أيها الملك السعيد ذو العقل الرشيد أن المهندس هشام عرفات وزير النقل والمواصلات بيفكر يلغي الفلوس من تذاكر المترو والأتوبيسات ! - معقولة؟ أومال الناس تركب بلوشي ولا بدال النقدي تدفع شيكات ولا يكونش عايز يقلبها أتوبيسات رحلات؟ - لا يامولاي مش للدرجة دي هو قصده حسب ماقالت الوكالات إن الناس ممكن بدال ماتدفع فلوس ولا شيكات تدفع شوية بيضات. - طب ليه ماندفعش عجة وعليها شوية سلاطات؟ - انت بتهزر يامولاي..طيب مانقضيها تسالي ونجيب فشار وغزل بنات؟الأمر جد خطير وده كلام واحد وزير. - وزير ولا غفير أنا برج من عقلي حايطير! - طب تحب أزيدك من الشعر بيت يامولاي من غير تفكير ولا دراسات؟ - زيديني بيت أو حتي أبيات. - الوزير عرفات قال يامولاي إن تذكرتين المترو في مصر يجيلهم بتلات بيضات لكن في بلاد الفرنجة التذكرة تجيب سبع بيضات وانت سيد العارفين دول يطعلولهم بشوية يوروهات..واليورو يعمل بالمصري شيئ وشويات. - أما الراجل ده عليه حركات وهو يعني الشعب ناقص افتكاسات؟ - ماهو ده اللي قاله الناس في البوستات والكومنتات وقالوا لو عرفات بيشبهنا بفرنسا في البيض طيب ما يدينا نفس المرتبات؟ - باقولك إيه سيبك من حكايات البيض والمتروهات وقوليلي إيه الجديد في عالم الموبايلات؟ - اسكت يامولاي مش احنا خلاص بقي عندنا موبايل بينافس أغلي الماركات؟ - طب إجري قوام هاتيلي واحد لحسن خلاص زهقت من النوكيا والسامسونج والتابلت والآي فونات. - فرحة ماتمت يا مولاي خدها الغراب وسرق البطاريات! - طب نادي مسرور يجيبلي شوية ورق وحبر وريشات وغوري من وشي لحسن ألبسك الكلابشات!. - أكيد حتكتب ألف ليلة وليلة يامولاي؟ - إنتي قديمة أوي،اسمها دلوقتي ألف بيضة وبيضة !