كان وأصبح .. هذه باختصار حياة صاحب ال"المراية " عبد الباسط حمودة كان قبل 25 من يناير يرفض الكلام في السياسة رافعا شعار"ابعد عن الشر " وغنيله .. بل وكان يرفض الغناء لها من قريب او بعيد واصبح بعد الثورة خبيرا سياسيا يفكر في مصر الغد ويضع سيناريوهات المستقبل وتوقعاته للرئيس القادم كان قبل الثورة ينظر الي نفسه في المراية فيجد علامات الكبر والشيخوخة وقد اصابته مبكرا بسبب "حال الزمن " وبعد ذلك يبحث عن "ضحكة سلف " تداري حزن القلب الذي اصابه بعد ان اختفت الابتسامة من علي شفاه الناس ليتساءل باعلي صوته هي الدنيا جري لها ايه ؟ وبعد الثورة أسرع ليطبع قبلة حانية علي خد مصر ابتهاجا بنجاح ثورة التغيير واسرع يغني لها داعيا لبدء ثورة التصحيح والتطهير .. السطور التالية حوار مع السياسي الشعبي عبد الباسط حمودة الذي خلع عن نفسه الرداء الفني ليتحدث بعفوية وتلقائية عن مطالب سكان الدويقة والدرب الاحمر الذين يعتبرون عبد الباسط "عمدتهم" في الفترة المقبلة . سالته عن ثورة 25 يناير وهل كان يتوقع نجاحها ؟ بصراحة محدش في مصر كان متوقع ان الثورة تقوم .. كان عندنا احباط شديد ان حال البلد يتغير .. كل شئ حلو اتغير الحياة مبقاش ليها طعم .. قلوب الناس كانت موجوعة قوي .. الفقير مكانش ليه "دية " ولا حد بيسأل عنه .. حاسين انا في بلد مش بلدنا .. اننا اغراب جنسيتنا في البطاقة مصر بس مش حاسين ببلدنا .. حقوقنا مهضومة ومنسية واولاد الذوات عايشين عيشة مية مية .. كنا بنحلم بالتغيير وغنينا كتير بمواجع الناس . طب تابعت الثورة ازاي ؟ زي كل المصريين تابعتها من التليفزيون بس بصراحة مكنتش بصدق التليفزيون المصري .. بيحسسني ان الدنيا ربيع والجو بديع كمان فيه شباب من الدويقة والدرب الاحمر كانوا بيروحوا التحرير وبيجوا يحكولنا ايه اللي بيحصل هناك .. كنت طول النهار متابع الفضائيات العربية وبالليل اقعد مع اولادي واصحابي نحمي البيت اللي ساكنين فيه والمنطقة خاصة بعد الكلام اللي سمعناه عن عمليات سرق ونهب . عشان كده غنيت " علي خد مصر " ؟ طبعا ودي اقل حاجة .. اني اساهم في الثورة بصوتي .. فترة زي دي لازم نسجلها في اغانينا .. تابعت اللي بيحصل وكنت خايف من بكرة . وايه رايك في مصر بعد الثورة ؟ احلي بكتير طبعا .. بس بصراحة كل يوم لما بشوف كمية الفساد الرهيبة اللي كانت موجودة في البلد اقول ايه الافتراء ده ده جبل فساد مالوش نهاية . اغانيك الجديدة هيكون شكلها ايه هتتأثر بالثورة برضه ؟ طبعا انا لسان حال الناس لو اتغير حالها هغني اللي حصلهم وانا متفائل ببكرة وان شاء الله هيكون البومي الجديد هيكون كله فرحة وسعادة زي ما كان البومي القديم كله حزن. صحيح ايه حكايتك مع الحزن وليه كل الاغاني الشعبية الحزينة بتنجح زي "سلفني ضحكتك " و"الدنيا جرالها ايه " ؟ لأن الناس موجوعة وتعبانة، بص لأي حد في الشارع.. قليل لما تلاقي واحد بيضحك من قلبه؟ اللي مش لاقي عيش لولاده، واللي طالع عينه طول اليوم في شغله ومرتبه مش بيكفي، واللي مش لاقي شغل من أساسه واللي كان شاب ولقي فجأة شعره أبيض . يعني الناس تعبانة وأنت بدل ما تفرحهم بتعكنن عليهم؟ مش بعكنن، أنا بقول اللي الناس حاسة بيه واللي عاوزين يسمعوه واللي بيدوس علي جرح الناس هو اللي بينجح علشان كده أغنية "أنا مش أنا" نجحت لأني رجعت الغنا الشعبي عشرين سنة، لأيام ما كان الغناء الشعبي غنا بجد . حالتك المادية جيدة، لماذا لم تسكن في أحد الأحياء الراقية ؟ أنا راجل شعبي، يعني بحب الناس وأحب أكون وسطهم وآخد رأيهم في كل اللي بغنيه، ومن هنا بختار الأغاني بتاعتي ومش بحب ألبس توب غير توبي، وبعدين الأحياء الراقية دي مش هلاقي فيها ناس تحبني وأحبهم وتفهمني وأفهمهم زي هنا، علشان كده أنا لو خرجت بره "الدويقة" اموت . انتخابات مجلس الشعب علي الابواب .. مش ناوي تترشح وتدخل البرلمان ؟ لا انا ماليش في الانتخابات انا صوتي اقوي من اي عضو مجلس شعب والحمد لله ربنا بيقدرني واخدم اهل منطقتي من غير الحصانة بس كفاية ان الناس تنتخب اللي هي عايزاها مش اللي التزوير بيجيبه ..ولا اللي بيتشري الناس بالفلوس ويزورهم كل انتخابات وبس .. اخيرا هنشوف انتخابات نظيفة.. عمار يا مصر .
