ممتاز القط والله العظيم احنا زهقنا وقرفنا وروحنا بقت في حلوقنا من كتر البلاوي اللي عمالة تتحدف علينا شمال ويمين!! الناس دلوقتي ماشية تكلم نفسها.. كله قرفان وتعبان ومغموم وحالته كرب الكرب! ايه السبب؟! محدش عارف آي حاجة من كل ما يقال.. أهو لت وعجن وكلام فاضي لا يودي ولا يجيب وممكن يودي بلدنا في ستين داهية لا قدر الله. وطبعا الشماعة اللي بنعلق عليها كل الاخطاء والبلاوي السودة وعيشتنا الهباب موجودة وجاهزة وهي الإخوان المسلمين -رغم ان احنا اللي جبناهم للسلطة ومحدش ضرب حد علي ايده وهو بيختار!! طبعا ممكن بعض الناس تقول ان صاحبنا.. قصدهم انا طبعا.. اتحولت ودي تهمة من التهم اللي لا يمكن حد يصدقها لان موقفي معروف وواضح ولا يحتاج لأي مزايدة لاني علي خلاف بطول الخط وعرضه مع توجهات خاطئة للإخوان ولكن بالعقل والمنطق بعيدا عن مبدأ خالف تعرف. لابد وللمرة التريليون »ده بمناسبة ديونا الخارجية والداخلية« أقول لابد ان نتعامل مع الواقع ومع رئيس جاي بالاختيار الحر ولفترة محددة. لازم نعطي له الفرصة لكي نحكم علي الاداء.. رغم أنه يعمل في ظروف صعبة واقتصاد منيل بستين نيلة.. ومع ناس همها الوحيد انها تزود مرتباتها لكن الحكم علي الرئيس سابق لآوانه لانه مازال يعمل بمفرده وفي غياب لسلطة البرلمان ولحين انتهاء اعداد الدستور الجديد. المهم أنا مش عارف آخرة اللت والعجن ايه حول الدستور الجديد والذي لم ينتهي حتي الآن!! ولكن كل كام يوم يطلع واحد ابن حلال يرقع كام تصريح يولع بيهم الدنيا علي طريقة شعللها شعللها.. ولعها ولعها.. وطبعا كلها تصريحات خايبة زي أصحابها لا تودي ولا تجيب ولحد دلوقتي محدش قال لنا حاجة عن التوجه الاقتصادي؟! وعن الموقف من القطاع الخاص؟! محدش قال حاجة عن حقوق العمال والفلاحين! ولا عن سياستنا الخارجية!! لكن شاطرين نتكلم حوالين البنت تتجوز في سن تسعة ولا عشرة وناسيين ان دلوقتي سن الزواج ارتفع لتلاتين ومصر كلها بتعاني من العنوسة بسبب الفقر والغلا اللي بياكل في الناس أكل. يا عالم فوقوا بقة قبل بلدنا ما تضيع في شربة مية!!! بلاش الأمور التافهة والساذجة وقولوا لنا الحقيقة.. قولوا لنا امننا القومي فين دلوقتي والكماشة تكاد تطبق علي انفاسنا من الجنوب والشرق والغرب والشمال.. قولوا لنا حاجة عن مية النيل قبل ما تغرق مركبنا.. قولوا لنا حاجة عن روح الحقد والغل اللي ملت نفوسنا.. ايه اللي حصل لنا؟!