قبل ان تقرأ : بمجرد أن نطق المستشار فاروق سلطان واعلن : مرسي رئيسا للجمهورية بكيت وابتسامتي تملأ وجهي ، فسألني زميل : للدرجة فرحان بنجاح مرسي ؟ فقلت له : للدرجة فرحان بسقوط شفيق .. وان الثورة قطفت الآن فقط أولى ثمارها ، ليس بمجيء مرسي ، ولكن برحيل شفيق إلى غير رجعة هو ونظامه القديم .. مجرد شمعة أضاءت وسط ظلام دامس لا يزال يهيمن حتى هذه اللحظة على جوانب الصورة. *********** سبقتني العزيزة جدا دعاء سلطان في مقال رائع " في أصول الردح " واتصلت بها على الفور أحييها على جدعنتها والتقاطها الذكي لمداخلات فنانين وفنانات قبل إعلان النتيجة بيوم واحد مع " مقطفين " من مقاطف الفضائيات .. مصطفى " بدري " وتوفيق عكاشة.. وكنت أنوي الكتابة في نفس الموضوع ، غير أن انفعالي بعد إعلان فوز مرسي سرق تركيزي ، ففضلت الصمت اللحظي حتى استطيع تناول نفس موضوع دعاء ، ولكن بإضافات وانطباعات جديدة.
وبداية أقول أن المثل الذي نقوله دائما " علم في المتبلم يصبح ناسي " ينطبق على كثيرمن لا أقول إعلامي ولكن مقاطف وقفف الفضائيات ، واذكر منهم حسبما صادفني مصطفى بدري وتيفة .. وعدت بالذاكرة لسنتين إلا شوية قبل ان يتنحى مبارك وتحديدا بعد خطابه الذي قال فيه انه عاش في مصر وسيوارى جثمانه تراب مصر " ياحنيين " .. وبعده مباشرة انطلقت الفضائيات المأجورة والتليفزيون المصري بالقطع ، وهاتك يا مداخلات من حسن افندي يوسف وزوجته الحاجة شمس وعفاف شعيب وسماح أنور وروجينا وجوزها الافندي بتاع نقابة الممثلين ، وهاتك يا نهنهة وسحيّ يادموع على الراجل الكبير اللي احنا عايزين نهينه .. وعيب كده .. ده أبونا وامنا .. مش ممكن نعمل فيه كده ، وبعدها بلحظات كما هو مُرتب ومُعد له ، نزلت مظاهرة مصطفى محمود بالفنانين المشخصاتية ولعيبة الكورة اللي التخين فيهم معلوماته لا تساوي معلومات واحد معاه اعدادية وحصل اللي كلنا شفناه وعشناه.
.. بالمللي .. كأنك بترجّع الشريط من أوله حدث قبل إعلان النتيجة بيوم .. قال إيه يا سيدي الست الهام شاهين الممثلة بتاعت " سوق المتعة " اتصلت بالفراعين وقالت لتيفة عكاشة انت أعظم واحد في مصر .. وانت اثبت للدنيا كلها انك مصري بجد ، وانها مش ممكن تفوّت حلقة من حلقات البيه المقطف والدلدولة بتاعته حياة ، ولو حصل غصب عنها نتيجة انشغالها بالتصوير ان فاتتها حلقة من حلقات الافندي ، تتصل بزميل او زميلة حتى يمدها بها عشان لو مر يوم من غير ما تتفرج على تيفة مينحسبش من عمرها.
ياتك ستين نيلة انتي وهو في يوم واحد .. عشان كده يا ست الهام شبهتك ب " شبشب زنوبة " .. وبيني وبينك انا مش عارف ليه اسمه زنوبة .. هل كانت صباح مثلا بتلبسه وهى بتغني " زنوبة .. حلوة وخفة وحبوبة " فتمت تسمية الشبشب نسبة إلى صباح ؟ يمكن .. المهم .. الشبشب بنلبسه عشان يشيل وساخات الأرض ويحمي رجلينا منها .. وانتي بالضبط كده .. مجرد شبشب نلبسه ولما يتوسخ او يتقطع او ريحته تبقى معفنة نرميه ونجيب شبشب غيره .. فازاى يا ست هانم يا فنانة يا كبيرة ترضي لنفسك تبقى شبشب في رجل مقطف زي توفيق عكاشة .. وبذمتك مش مكسوفة من نفسك وانت بتقولي له : انت اعظم واحد في مصر وان دفاعك عن المجلس العسكري من منطلق وطنية ومحبة خالصة لتراب البلد ، وان لولاك ماكناش عرفنا المستخبي .. حقيقي حقيقي انا فخورة بأن في مصر واحد زي حضرتك .. كل ده بعد مليونية المنصة اللي كانت ناقصة واحدة زيك تنزل وترقص عشرة بلدي وتغني في حب شفيق.
نيجي بقى على صابرين هانم وعشان متفهمش عنواني غلط أقول لها .. أعرب ما تحته خط : أكل احمد التفاحة .. أكل فعل ماضي .. واحمد فاعل .. والتفاحة مفعول به .. مش كده ولا انا غلطان .. طيب ليه التفاحة مفعول به؟ .. لأنها لا تملك من أمرها شيئا .. لا تستطيع أن تمنع احمد من أكلها .. حتتاكل حتتاكل .. مش بمزاجها .. وانت يا ست صابرين يا اجهل من دابة تمشي على أربع مفعول به .. بمعني عايزينك تقولي كلمتين حلوين على شفيق .. من عنيه .. وكلمتين زيهم على المجلس العسكري .. تؤمر أمر .. وقبلها لو كنت ناسية قلت في مبارك نفس الكلام بتاع خالتك عفاف شعيب واختك سماح انور .. انتوا إيه .. مجرد أراجوزات .. بغبغانات .. مالكوش اى قيمة .. للدرجة دي " دلاديل " .. مفيش حد عنده مخ بتلاتة تعريفة يوزن الأمور صح .. وميرضاش لنفسه يبقى مفعول به دايما.
وتسيبي يا ستي صابرين مصطفى بكري بعد كلمتين معفنين .. وتروحي على الفراعين ومداخلة خايبة مع واحدة أخيب منك وتقولي لحياة الدرديري : انا فخورة ان في مصر واحدة زيك يا حياة .. داهية تاخدك انتي وهى وتريحنا من وشوشكم العفشة.
للدرجة دي التمثيل طلع مجرد حرفة زي مهنة الميكانيكي .. الأول استاذ في صنعته .. وانت استاذة في صنعتك .. تبقى أشرف واحدة في الدنيا ، وتعملي دور واحدة " مومس " ، كأنك نازلة من بطن أمك عاهرة .. إنما مخك فيه إيه ؟ .. بطاطس وزلابية ودبان وصراصير .. مجرد واحدة شاطرة في التقمص والتشخيص ولكن الدماغ فاضية ، الا من العته والتخلف العقلي .. وتخليكي جاهزة لواحد زي مصطفى بدري او توفيق عكاشة او الدرديري .. عايزينك تعملي دور واحدة خايفة ع البلد وتشكري في الفريق شفيق والمشير طنطاوي .. فبسرعة ومن غير ماكياج تطلعي زي الهبلة وترددي ما أملوه عليك.
عموما .. تيفة اللي قال لك قولي ع المجلس العسكري انه أحسن مجلس في العالم ، انقلب عليه واتهمه انه باع البلد للإخوان وقال بعضمة لسانه ، ان هو شخصيا طلبوا منه يجيب واحدة زيك وزي شبشب زنوبة اختك الهام تقولوا البقين اللي عايزكم تقولوهم ، واتضح لتيفة في الأخر انه المجلس كان بيمرجحه وبيلعب بيه الكورة.
وقبل ما انسى .. تيفة بيدعو لمليونية يوم الجمعة لمهاجمة المجلس العسكري والمشير شخصيا ، وعايزك النهارده تتصلي بنفسك بالهانم الهام شاهين عشان تعملوا مداخلة مع جنابه .. و" تسبّوا الدين " للمجلس العسكري اللي قصّر رقابيكم وخلّى مناظركم " عِرة " وسط الخلق.
..وبالمرة اتصلي بمحمد صبحي واشرف زكي ومراته روجينا وامام الدعاة حسن يوسف ومراته الحاجة شمس وعمتك عفاف شعيب وابو دمعة جنان المعتوه عمرو مصطفى عشان الجمعة الجاية اللي حتكون تحت شعار : ضربتني على قفايا يا غزال تقوللي يمين تروح شمال .. ماترسي لك على بر .. نروح التحرير ولا المنصة؟