شال حلمه فى صدره ونزل ع الميدان قبض أمله بكفه واتوكل على الرحمن رايح يبدر لبكره بستان يزيح الحجر من على صدر الزمان يكسر صمت الحناجر والله نسينا اللى لينا لسان يقول للأسفلت أنطق ده عرق الغلابه زارعك عماير يقول للرمل أشهد باعوك بالتراب واشتريناك بجوعنا وضيق المكان يقول للقبور تحكى كام عليل مات بلا دوا وكام سليم مات عيان وتاوت ناس من كتر الشبع ووارت كام جعان اصرخ يا وطن هو فى بلد تعيش على لقمة الغلبان؟ اصرخ خلاص .. جه الخلاص والفتى شال عنك اللجام الصبح قدامك هى خطوه كمان وتلاقى النور ملا المكان ويركب الفارس الحصان وينزل من العرش السلطان فاكرينها كلها كوره أهى خلصت الفوره واخيراً أترفع العلم من اجل العزة والكيان وطلع كل الشعب رِجاله حتى اطفاله نسوان كل ده .. ويقولوا عليه عميل جبان آه يا إذاعة مخنثة البيان يا حكم ما بيختشى وازاى يختشى وهو واكل سُحت ومرتشى وواخد ع الذل والهوان ويقول له ارجع ارجع من اجل الأمان هو فين الأمان فى بناتنا اللى بتُغْتَصب ولا فى بيوتنا اللى بتتنهب والميكروباسات بتدهسنا واحنا شهود عيان بقى هو ده الأمان؟ سير يا بطل ع الميدان أمسك بكره بإيدك واتوكل على الرحمن اتوكل على الديان