عم احمد مات ؟؟ ولا دي اشاعات هري وهرتلة أو اي كلام ؟؟ *** ازاي ان كنت يادوب شفته من كام يوم بس عالشاشه ملعلع بيبدَع بكلام يتحس وانا قلبي معاه كان يتنطط ويعيش احلام *** كان عايش علشان يتنفس حب وحريه واشعار لا يخاف ولايسكت ويبسبس او حتي يخاف م الجوع والنار وياكلها بدقة عشان الحق لو حتي هيجوع أيام *** يا ما خد من عمره السجن راقات واتاريه هوه اللي بيديه بمزاج يدخل علشان مش راح يسكت وينادوا عليه ويقول افراج يتريق ويقول طظ يا ...تيت ياولاد الكلب يا غجر يا لئام *** اتريق علي طوب الارض وشتمهم بالطول والعرض انما في الاخر من جواه متشوفش ابيض من قلبه ده حد بيعيش مصري ويقول مصري دي بتاعتي ومش راح اسيبها لحد ويشيب الشعر اللي في وشه والقلب شباب للثورة إمام *** مات اللي مخافش من الحكام ورزعهم ياما كلام الغام سجنوه لسنين صبحت ايام عداها كانهاتعويره او حتي زكام اشعاره هتعيش جوانا وان سابنا ومات هنقوله سلام