السلام عليكم.. أنا مهندس باشتغل في شركة في الخليج، عندي 27 سنة وقعدت 3 سنين مابنزلش مصر، ولما نزلت كنت ناوي أخطب بنت قريبتنا كنت شايفها مناسبة، والحمد لله خطبتها.. وإحنا على توافق وانسجام من أول يوم، وهما ناس كويسين جدا، أنا بحبها وهي كمان، بس في يوم بافتح الإيميل بتاعها لقيتها باعتة إيميلات لواحد بتقول له إنها عايزة تكلمه، وفهمت إنها كانت بتكلمه في التليفون وبتقابله.. بس تاريخ الإيميلات قبل ما نرتبط ببعض، أنا عارف إنها من يوم ما اتخطبنا وهي مابتكلمش حد غيري، وأنا واثق فيها وواثق في تربيتها وعارف إنها ماكانتش بتعمل حاجة غلط، بس دلوقتي أنا محتار أقول لها إني قريت الإيميلات دي ولا لأ.. أنا عايز أقول لها بس مش عارف أقول لها إزاي، هي بتحترمني جدا وعارف إنها بتحبني جدا، يا ريت تنصحوني بسرعة لأني مش عارف أعمل إيه. أرجوك اديني رأيك..