في عيد الحب حبينا نقول لكل أصدقاء "بص وطل" كل سنة وإنتم في حب وخير وصحة وسعادة. وبالمناسبة دي فكرنا إننا نعمل لكم صفحة خاصة تقدروا تبعتوا لنا عليها رأيكم في أي موضوع أو مشكلة نطرحها مع بعض ونتناقش فيها وكل واحد يقول رأيه أو تجربته الخاصة في الموضوع اللي بنتكلم فيه. والموضوع اللي هنبدأ به كلامنا النهارده هو.. إزاي نحتفل بعيد الحب أو بأي مناسبة خاصة لو كان حبيينا بعيد عنا؟! وإحنا قررنا نبدأ بالموضوع ده بعد ما وصلت لنا مجموعة رسائل ومشاركات من شباب وبنات مخطوبين أو متجوزين؛ لكن السفر والغربة بعدت بينهم ومنعتهم من إنهم يتواصلوا ويعبروا عن مشاعرهم لبعض حتى في أحلى المناسبات في حياتهم ودي نماذج من المشاركات اللي وصلت لنا.. بجد أنا زعلانه علشان مش هاقدر أعمل هدية لخطيبي لأن خطيبي مسافر بره مصر وعايزة أعمل له حاجة جديدة في عيد الحب؛ غير إني أبعت له رسالة على الموبايل لأننا على طول بنبعت رسايل لبعض.. يا ريت تساعدوني. حنين طيب أنا مسافر بره مصر أعمل إيه لخطيبتي في عيد الحب؟ أنا باكلمها كتير على الموبايل والنت، ده عادي بس عاوز أعمل لها مفاجأة جامدة. ساعدوني. kabo700 أنا خطيبي بعيد عني، يعني أنا في مصر وهو في الخليج؛ فلو فيه فكرة تاني غير الاتصال ممكن أعملها؛ مع العلم إني باكلمه على النت كل يومين أرجوكم ردوا عليّ. زائر يعشق بص وطل ممكن تدلوني أنا خطيبي مسافر أمريكا وهنتجوز بعد ثلاثة شهور، ومش عارفة أعمل إيه في عيد الحب؟ أرجوكم ردوا عليّ أعمل إيه؟ ماجدة موسى أنا جوزي مسافر السعودية يعني مش هاعرف أهاديه، أعمل إيه؟ لوجى متشكرة خالص وأفكار روعة؛ بس عندي سؤال: جوزي مسافر السعودية ونفسي أعمل له حاجة جديدة كده، وخصوصاً إني مش هاعرف أهدي له هدية. نودي كل سنة وكل بص وطل طيبين، بس أنا خطيبي بره ومش عارفة أحتفل معاه إزاي بعيد الحب، نفسي أجيب له هدية؛ بس هو خارج البلد يا ريت تحاولوا تساعدوني وشكراً أوي ليكم. ساسو كل عيد حب وأنتم طيبين، أنا خطيبي مسافر ونفسي أعمل له مفاجأة أو هدية بس مش عارفة أبعتها له إزاي أو أعمل إيه. عندكم أي اقتراحات؟ TMRA يا جماعه أنا خطيبي مسافر، ومش عارفة أعمل إيه، بصراحة متضايقة أوي لأني مش هاعرف أوصّل له إحساسي في اليوم ده. salma_529 طب أنا خطيبي مسافر بره وبعيد عني؛ حتى عيد ميلاده كان من كام يوم ومش عارفة أعمل إيه، انصحوني، ومحتارة حتى في أجازة الصيف أفاجئه مفاجأة حلوة إزاي؟ أو أقدم له هدية كويسة؛ بس برضة بطريقة حلوة وشيك؟ زائرة
ودلوقتي إحنا مستنيين رأيكم في الموضوع ده ولو فيه حد منكم عنده حل يا ريت يقول لنا عليه في أسرع وقت